თბილისის საქალაქო სასამართლოში საპროტესტო აქციებისას ნარკოდანაშაულის ბრალდებით დაკავებული ნიკა კაციას სასამართლო პროცესი მიმდინარეობს. საქმე მტკიცებულებათა გამოკვლევის ეტაპზეა და დღევანდელ სხდომაზე ბრალდების მოწმეებს – გამომძიებელსა და ექსპერტს უსმენენ.
„ეს შესაძლოა ბოლო პროცესია, რომელსაც მედია აშუქებს, რადგან რეჟიმი ვიდეოგადაღების აკრძალვას აპირებს… ცოტა დაგაგვიანდათ, რადგან სიმართლე უკვე მთელმა მსოფლიომ იცის“, – თქვა ბრალდებულმა სხდომის დაწყებისას.
ნიკა კაცია 2024 წლის 7 დეკემბერს დააკავეს. მას ბრალი სისხლის სამართლის კოდექსის 260-ე მუხლის მე-6 ნაწილით წარედგინა, რაც დიდი ოდენობით ნარკოტიკული საშუალებების უკანანო შეძენა-შენახვას გულისხმობს. იგი ბრალს არ აღიარებს, ამბობს, რომ ნარკოტიკი ჩაუდეს და მის დაკავებას საპროტესტო აქციებში მონაწილეობას უკავშირებს. დანაშაული, რომლის ჩადენასაც პროკურატურა მას ედავება, 8-დან 20-წლამდე ან უვადო თავისუფლების აღკვეთას ითვალისწინებს.
დღესვე, 25 ივნისს, თბილისის საქალაქო სასამართლოში საპროტესტო აქციებისას დაკავებული სხვა პირების პროცესებიც არის ჩანიშნული – სასამართლო სხდომები უნდა გაიმართოს ნარკოდანაშაულში ბრალდებული ექიმის, გიორგი ახობაძისა და პოლიციელზე თავდასხმაში ბრალდებული 19 წლის საბა ჯიქიას საქმეებზეც.
