მთავარისაქართველო30 აპრილი საქართველოს თავდაცვის ძალების დღეა

30 აპრილი საქართველოს თავდაცვის ძალების დღეა

საქართველოს თავდაცვის ძალების დაარსებიდან 34 წელი შესრულდა.

1991 წლის აპრილში წვევამდელების სავალდებულო სამხედრო სამსახურში გაწვევის ბრძანება პირველად გამოიცა. ჯარისთვის ისტორიული დღისადმი მიძღვნილი ღონისძიება აღინიშნა ტრადიციულად ვაზიანის სამხედრო ბაზაზე, რომელსაც მთავრობის წარმომადგენლები დაესწრნენ.

თავდაცვის ძალების დღე მათ საქართველოს ტერიტორიული მთლიანობისთვის მებრძოლ ჯარისკაცებს მიულოცეს, ასევე პატივი მიაგეს დაღუპულ ჯარისკაცებს.


.

„დღეს განსაკუთრებული დღეა, საქართველოს თავდაცვის ძალები 34 წლის გახდა. ამ უმნიშვნელოვანეს თარიღს ყველას გილოცავთ, განსაკუთრებით ჩვენს საამაყო ჯარს, გენერლებს, ოფიცრებს, სერჟანტებს, რიგითებს – ეს დღე თქვენ გეკუთვნით, თითოეულ მამაცს და პროფესიონალ სამხედროს, რომლებიც ღირსეულად ემსახურებით საქვეყნო მნიშვნელობის საქმეს და იცავთ სამშობლოს დამოუკიდებლობას, მშვიდობასა და თავისუფლებას. სამხედრო სამსახური მოითხოვს სიმამაცეს, პროფესიონალიზმსა და პატრიოტიზმს, თითოეული თქვენგანი გმირობისა და თავდადების მაგალითია. სწორედ თქვენ წარმოადგენთ, იმ მტკიცე საყრდენს, რაზეც დგას ჩვენი სახელმწიფოს თავისუფლება, სუვერენიტეტი და მშვიდობიანი მომავალი. საქართველოს დამოუკიდებლობის აღდგენასთან ერთად ქართული ჯარის ჩამოყალიბებისა და მისი განვითარების მიმართულებით მნიშვნელოვანი ნაბიჯები გადაიდგა. შექმნის დღიდან, 34-წლიანი ისტორიის განმავლობაში თავდაცვის ძალები ყველა ომსა და ბრძოლაში ღირსეულად იცავდა საქართველოს ტერიტორიულ მთლიანობასა და თავისუფლებას, რისთვისაც ქედს ვიხრი თითოეული სამხედრო მოსამსახურის წინაშე“, – თქვა მიხეილ ყაველაშვილმა.

მთავრობის წევრთა შეფასებით, „ქართული ოცნების“ ხელისუფლებაში ყოფნის განმავლობაში საქართველოს თავდაცვის ძალების წინაშე არსებული არაერთი რთული გამოწვევა გადაილახა.

„გერქვას საქართველოს ჯარისკაცი, ეს ერთდროულად უდიდესი პატივი და უზარმაზარი პასუხისმგებლობაა. ამ სტატუსის ღირსებით ტარებას დიდი შრომა და თავდადება სჭირდება, სწორედ ამიტომ იმსახურებს საქართველოს ჯარისკაცი ხალხის ნდობასა და სიყვარულს. მადლობას გიხდით, თითოეულ თქვენგანს გამოჩენილი სიმამაცისა და სამშობლოს სამსახურისთვის. ჩვენი სამხედროების ყველა საბრძოლო წარმატება შეუპოვრობის, სიმტკიცისა და მებრძოლის ბუნების გამოვლენის უამრავ მაგალითს აერთიანებს. თქვენს ღირსებას, პროფესიონალიზმსა და თავდადებას ყველა ერთხმად აღიარებს, საქართველოსა და მის ფარგლებს გარეთ. დღევანდელი დღე განსაკუთრებული პატივით მინდა მივულოცო საქართველოს ტერიტორიული მთლიანობისთვის ბრძოლებსა და საერთაშორისო მისიებში დაღუპული ჯარისკაცების ოჯახებს და მინდა მათ ვუთხრა, რომ ჩვენს გმირებს არასდროს დავივიწყებთ და ყოველთვის სათანადო პატივს მივაგებთ. ქართველი ხალხის მეხსიერებიდან არასდროს წაიშლება სამშობლოსთვის თავგანწირვისა და გმირობის მაგალითები, რომლითაც თითოეული ჩვენგანი ამაყობს. ქედს ვიხრი ჩვენი გმირების ნათელი ხსოვნის წინაშე.

მინდა განსაკუთრებული პატივისცემა გამოვხატო შეიარაღებული ძალების ვეტერანების მიმართ, რომელთა დიდ ნაწილს სამშობლოს სამსახური ჯანმრთელობის ფასად დაუჯდა, თუმცა ისინი დღესაც მზად არიან თავდადებისთვის. ქართული თავდაცვის ძალები ჩვენი სუვერენიტეტისა და დამოუკიდებლობის ურყევი გარანტიაა. სწორედ ამიტომ ჩვენი მთავრობის პრიორიტეტთა შორის თქვენ უპირველესი ადგილი გიკავიათ. დარწმუნებული ვარ, ქვეყნის თავდაცვისა და უსაფრთხოების უზრუნველყოფის საქმეში სულ უფრო ძლიერი და საიმედო ძალა იქნებით და ჩვენი ქვეყნისა და ხალხის იმედს ყოველთვის გაამართლებთ. გარწმუნებთ, ჩვენი ხელისუფლება, ისევე როგორც დღემდე, მომავალშიც უზრუნველყოფს ქვეყანაში მშვიდობასა და სტაბილურობას. გილოცავთ დღევანდელ დღეს, ღმერთი ფარავდეს ჩვენს სამშობლოს“, – განაცხადა პრემიერ-მინისტრმა ირაკლი კობახიძემ.

1999 წლიდან დღემდე ქართველმა სამხედროებმა არაერთ საერთაშორისო მისიაში მიიღეს მონაწილეობა, რითაც წვლილი შეიტანეს გლობალური მშვიდობის უზრუნველყოფაში. საქართველოს თავდაცვის ძალების ჯარისკაცები ჩართულნი იყვნენ საერთაშორისო სამშვიდობო მისიებში: კოსოვოში, ერაყში, ავღანეთში, მალისა და ცენტრალური აფრიკის რესპუბლიკაში.

უახლესი

სხვა ამბები

spot_imgspot_img
Send this to a friend