სააგენტო GLOBALNEWS წერს, რომ საქართველოს შესახებ დასმულ კითხვაზე სახელმწიფო დეპარტამენტისგან მიიღეს წერილობითი პასუხი, რომელშიც ნათქვამია, რომ აშშ-მა ნათლად ისაუბრა იმ ნაბიჯებზე, რომელთა გადადგმაც საქართველოს მთავრობას შეუძლია, რათა აჩვენოს, რომ სერიოზულად არის განწყობილი აშშ-სთან ურთიერთობის გასაუმჯობესებლად.
ამასთან, მათ მიერ გავრცელებულ წერილში წერია, რომ სახელმწიფო დეპარტამენტმა „ქართული ოცნების“ მთავრობის მიერ განხორციელებულ განგრძობით ანტიდემოკრატიულ ქმედებებზე საუბრისას აღნიშნა, რომ დემოკრატიული მანდატის მოპოვება ვერ მოხდება მოწინააღმდეგეების ცენზურით ან ციხეში ჩასმით.
„რაც შეეხება „ქართული ოცნების“ მთავრობის მიერ განხორციელებულ განგრძობით ანტიდემოკრატიულ ქმედებებს. როგორც ვიცე-პრეზიდენტმა ვენსმა მიუნხენში აღნიშნა, დემოკრატიული მანდატის მოპოვება ვერ მოხდება მოწინააღმდეგეების ცენზურით ან ციხეში ჩასმით, ასევე ვერ მოიპოვებთ მას ძირითადი ელექტორატის პოზიციის უგულებელყოფით.
შეერთებული შტატები 33 წლის განმავლობაში საქართველოსა და ქართველი ხალხის პარტნიორია და ამ ხნის განმავლობაში ძლიერი მხარდამჭერი საქართველოს დამოუკიდებლობის, სუვერენიტეტისა და ტერიტორიული მთლიანობის საკითხებში“, – ნათქვამია GLOBALNEWS-ის მიერ გავრცელებულ კომენტარში.
