უნგრეთის მმართველმა პარტიამ Fidesz-მა ორშაბათს პარლამენტს წარუდგინა კანონპროექტი, რომელიც აკრძალავს ლგბტქ+ პრაიდის მსვლელობას და დააწესებს ჯარიმებს ორგანიზატორებსა და იმ პირებზე, რომლებიც ღონისძიებას დაესწრებიან.
პრემიერ-მინისტრმა ვიქტორ ორბანმა გააკრიტიკა ლგბტქ+ საზოგადოების წარმომადგენლები და პირობა დადო, რომ უნგრეთში აღმოფხვრის დამოუკიდებელი მედიის, ოპოზიციური პოლიტიკოსებისა და არასამთავრობო ორგანიზაციებისთვის უცხოური დაფინანსების მიღებას.
ორბანმა, ნაციონალისტმა პოლიტიკოსმა, რომელიც ახალი მზარდი ოპოზიციური პარტიისგან უპრეცედენტო გამოწვევის წინაშე დგას, აშშ-ს პრეზიდენტის დონალდ ტრამპის ინაუგურაციის შემდეგ მედიასა და ლგბტქ+ პირებზე თავდასხმები გააძლიერა.
Fidesz-ის მიერ ორშაბათს წარდგენილი კანონპროექტი კრძალავს პრაიდს იმ მოტივით, რომ ის შეიძლება საზიანო იყოს ბავშვებისთვის.
„შემოთავაზებული კანონპროექტი ცვლის კანონს, რომელიც არეგულირებს შეკრების უფლებას და ითვალისწინებს, რომ აკრძალულია შეკრების ჩატარება, რომელიც არღვევს ბავშვთა დაცვის შესახებ კანონში დადგენილ რეგულაციებს“, – ნათქვამია კანონპროექტში.
კანონპროექტში ასევე წერია, რომ პოლიციას შეუძლია, გამოიყენოს სახის ამომცნობი კამერები იმ პირების იდენტიფიცირებისთვის, რომლებიც ესწრებიან ღონისძიებას.
