სერბეთის დედაქალაქში ათობით ათასი მოქალაქეა შეკრებილი საპროტესტო აქციაზე.
დემონსტრაცია დაგეგმეს სტუდენტებმა, რომლებიც უკვე 4 თვეა, ითხოვენ ნოვი სადში მომხდარი ტრაგედიის სამართლიან გამოძიებას. იქ რკინიგზის სადგურზე სახურავის ჩამონგრევას 15 ადამიანი შეეწირა.
მთელი ამ დროის განმავლობაში სტუდენტებს დაბლოკილი აქვთ უნივერსიტეტების ფაკულტეტები. მათი მოთხოვნაა, გამოქვეყნდეს ყველა დოკუმენტი, რომლებიც რკინიგზის სადგურის მშენებლობას უკავშირდება და დაისაჯონ დამნაშავეები.
მასშტაბური საპროტესტო აქციების ფონზე რამდენიმე კვირის წინ დაიშალა სერბეთის მთავრობა, თუმცა აქციის მონაწილეებს მიაჩნიათ, რომ ეს საკმარისი არ არის.
ისინი კვლავ უარს ამბობენ, დაუბრუნდნენ სასწავლო პროცესს.
სტუდენტურმა აჯანყებამ სერბეთში მთელი სასწავლო წელი კითხვის ნიშნის ქვეშ დააყენა. ამ დროისთვის სერბეთის დედაქალაქში საზოგადოებრივი ტრანსპორტის მოძრაობა შეჩერებულია.
ეს საპროტესტო აქცია ერთ-ერთი ყველაზე მასშტაბური დემონსტრაციაა, რომელიც პრეზიდენტ ვუჩიჩის წინააღმდეგ იმართება.
