ნორვეგიის საგარეო საქმეთა სამინისტრო გამოცემების – „ნეტგაზეთისა“ და „ბათუმელების“ დამფუძნებლის, მზია ამაღლობელის დაკავებას ეხმაურება.
პლატფორმა X-ზე გამოქვეყნებულ განცხადებაში, დიპლომატიური უწყება ჟურნალისტის პატიმრობიდან დაუყოვნებლივ გათავისუფლებას მოითხოვს.
„ცნობილი ჟურნალისტის, მზია ამაღლობელის შიმშილობის მე-18 დღე. მისი გაუმართლებელი წინასწარი პატიმრობა მედიის წარმომადგენლების, აქტივისტებისა და დემონსტრანტების წინააღმდეგ მკაცრი ზომების მიღების მხოლოდ ერთი მაგალითია. მზიას დაუყოვნებლივ გათავისუფლებას მოვითხოვთ“, – წერს ნორვეგიის საგარეო საქმეთა სამინისტრო პლატფორმა X-ზე.
ჟურნალისტი და მედიამენეჯერი მზია ამაღლობელი ბათუმში 11-12 იანვრის ღამით დააკავეს. პროტესტის ნიშნად, ის მე-18 დღეა შიმშილობს.
მზია ამაღლობელის ჯანმრთელობის მდგომარეობასთან დაკავშირებით კითხვები აქვთ უფლებადამცველებს, ასევე მის კოლეგებს, რომლებიც ჟურნალისტის მხარდასაჭერად ყოველდღიურად მართავენ საპროტესტო აქციებს.
