ევროკავშირის ყველა სტრუქტურაში უკვე თითქმის 1 წელია საუბრობენ, რომ საქართველო გახდება თუ არა უახლოეს წლებში გაერთიანების წევრი, ეს ხელისუფლების ნაბიჯებზეა დამოკიდებული.
„ქართული ოცნების“ ლიდერები მრავალი კრიტიკისა და ნეგატიური ანგარიშების ფონზე არჩევნებიდან რამდენიმე დღეში აცხადებენ, რომ საქართველო ისეთი უნდა მიიღოს ევროკავშირმა, როგორიც არის.
„გავაგრძელებთ ევროპისკენ სვლას ზუსტად ისე, როგორც აქამდე. ვაგრძელებთ სვლას ზუსტად ისე, როგორც ასოცირების ხელშეკრულებაზე მოვაწერეთ ხელი და ვასრულებთ.
კანდიდატის სტატუსი მივიღეთ დიდი ბრძოლით! მაშინაც გვქონდა ანტიქართული განცხადებების კასკადი. 1 წლის განმავლობაში დაგვიანებით სამართალი ჩვენთანაც მოვიდა და კანდიდატის სტატუსი მივიღეთ ბრძოლით.
რაც შეეხება ღირებულებებს, არ არის ევროპული ღირებულება, როდესაც მოგვიწოდებენ LGBT კანონის გაუქმებას. ჩვენ სხვანაირი ევროპა ვიცით, სხვანაირ ევროპაში გვინდა. დარწმუნებული ვარ, კონსერვატიული ძალები გაიღვიძებენ ევროპაში და მიხვდებიან, რომ ტრადიციული, ქრისტიანული, ეროვნული ღირებულებები ქვეყნის რეალური მენტალობიდან გამომდინარე ბევრ ევროპულ ქვეყანაში კიდევ უფრო დაფასებული გახდება. ვერავინ გაბედავს, საქართველოს მოუწოდოს, „გამჭვირვალობის შესახებ კანონი“ გააუქმოს, LGBT პროპაგანდის წინააღმდეგ კანონი გააუქმოს, რასაც არ ვიზამთ. თუ ვიღაცას მიაჩნია, რომ ევროპული ღირებულებაა LGBT პროპაგანდა, ჩვენ ამ ღირებულებებს არასდროს გავითვალისწინებთ! ხელიც რომ შეგვიშალოს დროებით რაღაცაში, ჩვენ ამ „ღირებულებას“ არ გავითვალისწინებთ. გვირჩევნია, 2-3 წლით დაგვაგვიანდეს რაღაც, მაგრამ LGBT პროპაგანდის წინააღმდეგ მიმართულ კანონს არასდროს გავაუქმებთ!
2-5 წელიც დავიცდით, უფრო გვიან მოვა ჩვენთან სამართალი, ოღონდ ასეთ ღირებულებებს რაც რეალური, ეროვნული, ტრადიციულია, არ დავთმობთ! არ გავწირავთ საკუთარი პოლიტიკური, მერკანტილურ-პოლიტიკური მიზნებისთვის, ჩვენი მომავალი თაობებისთვის ღირსეულ, ტრადიციულ, ქრისტიანულ მომავალს. ხომ ყველას ეგონა, რომ რთული იქნებოდა, მაგრამ მივიღეთ კანდიდატის სტატუსი, ასე გავხდებით ევროპის სრულფასოვანი ოჯახის წევრი“, – განაცხადა „ქართული ოცნების“ ერთ-ერთი ლიდერმა მამუკა მდინარაძემ.
ოპოზიციონერი პოლიტიკოსები ევროინტეგრაციის გზაზე შემაფერხებელ გარემოებად „ქართული ოცნების“ პოლიტიკურ მმართველობას მიიჩნევენ. მათი განცხადებით, ასეთი რეალობის პირობებში წინ მხოლოდ უკუსვლა ჩანს.
ევროკავშირში გაწევრებისთვის მოლაპარაკებების გახსნის წინაპირობები საქართველოს სხვადასხვა მიმართულებით აქვს.
ალეკო გვეტაძე
