საქართველოს პრეზიდენტმა საპარლამენტო არჩევნების წინასწარ შედეგებზე პირველი ოფიციალური განცხადება 27 ოქტომბერს ოპოზიციონერ ლიდერებსა და სამოქალაქო სექტორის წარმომადგენლებთან შეხვედრის შემდეგ გააკეთა.
სალომე ზურაბიშვილი მედიასთან ოპოზიციური პარტიების წარმომადგენლებთან ერთად გამოვიდა და თქვა, რომ არჩევნების შედეგებს არ აღიარებს. პრეზიდენტი ამბობს, რომ ამ არჩევნების აღიარება საქართველოს რუსეთზე დაქვემდებარების აღიარებას ნიშნავს.
„ჩვენ ვიყავით რუსული სპეცოპერაციის მომსწრე. ჰიბრიდული ომის ერთ-ერთი ახალი ფორმის, რომელიც ჩვენს ხალხსა და ქვეყანაზე განხორციელდა“, – თქვა პრეზიდენტმა საგანგებო გამოსვლისას. სალომე ზურაბიშვილის განცხადებით, ტექნოლოგიები გამოყენებული იყო იმისთვის, რომ გაყალბება „გაეთეთრებინათ“.
„ჩვენ ერთად უნდა დავდგეთ და გამოვაცხადოთ, რომ არ ვაღიარებთ ამ არჩევნებს, არ ვეგუებით რუსეთს და მის შემოსვლას ამ ფორმით საქართველოში. ჩვენ დავდგებით ერთად. აქ არიან ის პარტიები, რომლებიც მონაწილეობდნენ არჩევნებში და იცავდნენ ევროპულ მომავალს. მათთან ერთად მინდა მოგიწვიოთ ხვალ საღამოს, 19:00 საათზე, რუსთაველზე იმისთვის, რომ გამოვუცხადოთ მსოფლიოს – ჩვენ არ ვაღიარებთ ამ არჩევნებს და ჩვენ ვიცავთ კონსტიტუციურ უფლებას, რომ მშვიდობიანად დავიცვათ ყოველი ხმა, ჩვენი მომავალი და იმის საშუალება რომ ამ ქვეყანაში ჩატარდეს დემოკრატიული არჩევნები”, – მიმართა პრეზიდენტმა მოქალაქეებს.
ორბელიანების სასახლეში სალომე ზურაბიშვილთან შეხვედრაზე იმყოფებოდა პარტია „გახარია საქართველოსთვის“ წარმომადგენელი დიმიტრი ცქიტიშვილი, თუმცა უშუალოდ პრეზიდენტის განცხადებისას, სხვა ოპოზიციონერ ლიდერებთან ერთად გიორგი გახარიას გუნდის წევრები არ ყოფილან. უცნობია, საქართველოს ყოფილი პრემიერ-მინისტრის პოლიტიკური გუნდის პოზიცია ქუჩის პროტესტთან დაკავშირებითაც.
ორბელიანების სასახლეში პრეზიდენტთან შეხვედრაზე და განცხადების გაკეთებისას მასთან ერთად იმყოფებოდნენ „კოალიცია ცვლილებისთვის“, კოალიცია „ძლიერი საქართველოსა“ და კოალიცია „ერთიანობა ნაციონალური მოძრაობის“ ლიდერები.
