„საქართველო ირჩევს ევროკავშირს!” – ამ სახელწოდებით გაიმართა დღეს, 20 ოქტომბერს, სახალხო მარში თბილისში. მარშის ორგანიზატორები არასამთავრობო ორგანიზაციები იყვნენ.
აქციის მონაწილეები საღამოს 5 საათიდან თბილისის სხვადასხვა ადგილას შეიკრიბნენ: რესპუბლიკის მოედანზე, გმირთა მოედანზე, 300 არაგველის ობელისკთან, მარჯანიშვილის მოედანსა და ამაღლებისა და ასათიანის ქუჩების კვეთაზე. ამ ადგილებიდან მონაწილეები მსვლელობით გაემართნენ თავისუფლების მოედნისკენ, სადაც აქცია-კონცერტი ჩატარდა.
აქციის ორგანიზატორებმა გაავრცელეს ღონისძიების აღწერაც: „როგორც ადრე – შეუჩერებელ მდინარეებად დავიძვრებით და შევუერთდებით თავისუფლების მოედანზე”.
მარშს საქართველოს პრეზიდენტი სალომე ზურაბიშვილიც შეუერთდა.
