რუსეთის უშიშროების საბჭოს მდივანი და თავდაცვის ყოფილი მინისტრი სერგეი შოიგუ ირანსა და აზერბაიჯანში ჩავიდა. გავრცელებული ცნობებით, მხარეებმა ისაუბრეს ახლო აღმოსავლეთში მზარდ დაძაბულობასა და 3+3 ფორმატზე.
ირანის ახალარჩეულმა პრეზიდენტმა რუსეთს ქვეყნის „მეგობარი” უწოდა, ხოლო ურთიერთობები მოსკოვთან „სტრატეგიულ ურთიერთობებად” მოიხსენია.
„ნიუ-იორკ ტაიმზის” ინფორმაციით, თეირანში საუბარი შეეხო სამხედრო თანამშრომლობასაც. უფრო კონკრეტულად კი, გამოცემა ვარაუდობს, რომ ირანმა კრემლს სთხოვა თანამედროვე თავდაცვითი იარაღი, რომლის მიწოდებაც ამავე წყაროს ცნობით, უკვე დაიწყო.
ირანისა და რუსეთის სამხედრო თანამშრომლობის გაღრმავება ხდება იმ ფონზე, როდესაც მთელი მსოფლიო ელოდება ირანის მხრიდან ისრაელზე თავდასხმას.
