თურქეთში სოციალური მედიის პლატფორმა Instagram დაბლოკეს. ასევე დაბლოკილია სოციალური ქსელის მობილურ აპლიკაციაზე წვდომაც.
დაბლოკვის გადაწყვეტილება თურქეთის საინფორმაციო ტექნოლოგიებისა და კომუნიკაციების სამსახურმა (BTK) მიიღო. უწყებაში არ საუბრობენ Instagram-ის დაბლოკვის მიზეზსა და ხანგრძლივობაზე.
მანამდე თურქეთის კომუნიკაციების ხელმძღვანელმა, ფაჰრეთინ ალტუნმა გააკრიტიკა პლატფორმა „ჰამასის“ ლიდერის, ისმაილ ჰანიეს გარდაცვალებისადმი მიძღვნილი პოსტის დაბლოკვის გამო.
„ვგმობ სოციალური მედიის პლატფორმას Instagram-ს, რომელიც ხელს უშლიდა ხალხს გამოექვეყნებინა სამძიმრის შეტყობინებები ჰენიეს მოწამებრივად გარდაცვალების გამო. ეს არის ცენზურის ძალიან მკაფიო მცდელობა“, – თქვა ფაჰრეთინ ალტუნმა.
