არასამთავრობოების ერთობლივი მიმართვა ხელისუფლებას

23 არასამთავრობო ორგანიზაციის მიერ გავრცელებულ ერთობლივ განცხადებაში საუბარია 27 ივნისს გამართული ევროსაბჭოს სხდომის შედეგებსა და საქართველოსთან დაკავშირებით გაკეთებულ განცხადებებზე. სამოქალაქო სექტორის განცხადებით, საქართველოში ბოლო პერიოდში განვითარებულ მოვლენებსა და დემოკრატიულ რეგრესზე ამ სხდომაზე „სერიოზული წუხილი გამოხატეს” ევროპელმა ლიდერებმა. არასამთავრობო ორგანიზაციები კიდევ ერთხელ მოუწოდებენ საქართველოს მთავრობას, გაიწვიოს უცხოური გავლენის გამჭვირვალობის შესახებ კანონი, არ აღუდგეს წინ საქართველოს მოქალაქეების უდიდესი უმრავლესობის ნებას, გახდეს ევროპული ოჯახის წევრი, ამისთვის კი, სათანადოდ შეასრულოს ევროკომისიის მიერ განსაზღვრული 9 ნაბიჯი.

„ევროპულმა საბჭომ საქართველოს ხელისუფლებას მოუწოდა, სიცხადე შეიტანოს თავის განზრახვებში აღებული კურსის შეცვლის გზით, რაკი ეს საფრთხის წინაშე აყენებს საქართველოს ევროკავშირისკენ მიმავალ გზას და „გაწევრიანების პროცესის დე-ფაქტო შეჩერებას გამოიწვევს”. ამასთან, ევროპულმა საბჭომ ხელისუფლებას მოუწოდა, 2024 წლის შემოდგომაზე უზრუნველყოს თავისუფალი და სამართლიანი არჩევნების ჩატარება და დაასრულოს სამოქალაქო საზოგადოების წარმომადგენლების, პოლიტიკური ლიდერების, სამოქალაქო აქტივისტებისა და ჟურნალისტების მიმართ წარმოებული ფიზიკური თავდასხმა, დაშინება და მუქარა.

ევროკომისია შემოდგომაზე წარმოადგენს გაფართოების მორიგ ანგარიშს, რომელშიც სხვა საკითხებთან ერთად შეფასდება საქართველოს მიერ ევროკომისიის მხრიდან განსაზღვრული 9 ნაბიჯის შესრულება.

საქართველოს ევროკავშირში გაწევრიანების პროცესის გაყინვის საფრთხე რეალურია, რასაც ასევე ადასტურებს ევროკავშირისა და მისი წევრი სახელმწიფოების მაღალი თანამდებობის პირთა მიერ გაკეთებული განცხადებები. აღნიშნულის შემთხვევაში ევროპული კავშირის ამ გადაწყვეტილებაზე პასუხისმგებლობა სრულად ეკისრება საქართველოს ხელისუფლებას.

ზემოხსენებულიდან გამომდინარე, გვსურს კიდევ ერთხელ მოვუწოდოთ ხელისუფლებას:

• გაიწვიოს რუსული კანონი და სხვა საკანონმდებლო ინიციატივები, რომლებიც ეწინააღმდეგება ევროკავშირის ფუნდამენტურ პრინციპებსა და ღირებულებებს;

• არ აღუდგეს წინ საქართველოს მოქალაქეების უდიდესი უმრავლესობის ნებას, გახდეს ევროპული ოჯახის წევრი და გაუფრთხილდეს ევროინტეგრაციის გზაზე მიღწეულ თითოეულ მონაპოვარს;

• შეასრულოს ევროკომისიის მიერ განსაზღვრული 9 ნაბიჯი”.

ხელმომწერები:

1. საქართველოს რეფორმების ასოციაცია (GRASS)

2. აღმოსავლეთევროპული ცენტრი მრავალპარტიული დემოკრატიისთვის

3. დემოკრატიის კვლევის ინსტიტუტი (DRI)

4. დემოკრატიის მცველები

5. ეკონომიკური პოლიტიკის კვლევის ცენტრი

6. თბილისი პრაიდი

7. ინფორმაციის თავისუფლების განვითარების ინსტიტუტი

8. მწვანე ალტერნატივა

9. სამართლიანი არჩევნები (ISFED)

10. სამოქალაქო საზოგადოების ფონდი

11. სასამართლოს გუშაგი

12. საფარი

13. საქართველოს ახალგაზრდა იურისტთა ასოციაცია (საია)

14. საქართველოს დემოკრატიული ინიციატივა (GDI)

15. საქართველოს ევროპული ორბიტა

16. საქართველოს მომავლის აკადემია

17. სოციალური სამართლიანობის ცენტრი

18. ტოლერანტობისა და მრავალფეროვნების ინსტიტუტი

19. უფლებები საქართველო

20. ქალთა ინიციატივების მხარდამჭერი ჯგუფი

21. წამების მსხვერპლთა ფსიქოსოციალური და სამედიცინო რეაბილიტაციის ცენტრი

22. საბჭოთა წარსულის კვლევის ლაბორატორია

23. საერთაშორისო გამჭვირვალობა – საქართველო