„ჩვენ არ გვსურს ომი, მაგრამ არც ომისგან გაქცევას ვაპირებთ”, – ამ სიტყვებით მიმართა ჩრდილოეთ კორეის დიქტატორმა კიმ ჩენ ინმა პარლამენტარებს 15 იანვარს.
ჩრდილოეთ კორეის ბოლოდროინდელმა რიტორიკამ და გახშირებულმა იარაღის გამოცდებმა სეულის მცხოვრებლებში გააჩინა შიში, რომ ნახევარკუნძულზე შესაძლოა მორიგი ომი დაიწყოს.
ადგილობრივები ფიქრობენ, რომ ფხენიანთან შეიარაღებული დაპირისპირების ალბათობა დიდია.
მიუხედავად კიმ ჩენ ინის განცხადებებისა სამხრეთ კორეის მოსახლეობა უკვე თაობებია ფხენიანისგან მუქარებს ისმენს. ჩრდილოეთ კორეის პროვოკაციებისა და სამხრეთის სამუდამო მტრად გამოცხადების ფონზეც კი, ბევრი სამხრეთ კორეელისთვის თავიანთი მშობლებისა და ბებია-ბაბუებისგან განსხვავებით სრულმასშტაბიანი ომი რთული წარმოსადგენია.
ჩრდილოეთ კორეის შეზღუდული რესურსების გათვალისწინებითაც კი, ბევრი მიიჩნევს, რომ სამხედრო კონფლიქტის შემთხვევაში სამხრეთ კორეას წინააღმდეგობის გაწევა გაუჭირდება.
წლების განმავლობაში კიმ ჩენ ინი დაუახლოვდა საკუთარ მიზანს, ჰქონდეს ბირთვული არსენალი, რომლის გამოყენებასაც ისევე როგორც მეზობელი ქვეყნების, ასევე აშშ-ის წინააღმდეგაც შეძლებს.
თანამდებობის დაკავების დღიდან სამხრეთ კორეის პრეზიდენტი იუნ სუკ იოლი აშშ-სა და იაპონიასთან ერთად ქვეყნის სამხედრო წვრთნების მასშტაბს აფართოებს. იგი ასევე ცდილობს, მოიპოვოს გარანტიები ვაშინგტონისგან, რომ ჩრდილოეთ კორეის თავდასხმის შემთხვევაში აშშ დაიცავს სამხრეთს.
გარკვეული პროგნოზების მიუხედავად ანალიტიკოსებისთვის არც ისე მარტივია განსაზღვრონ, თუ რას მოიმოქმედებს დიქტატორი, რომელსაც დაშინებისა და საყოველთაო კონტროლის ფონზე მოსახლეობა უპირობოდ ემორჩილება…
და არავინ იცის, სინამდვილეში რა ხდება მსოფლიოს ყველაზე ტოტალიტარულ ქვეყანაში ფასადური განცხადებებისა და დადგმული სცენების მიღმა.
