„ბაღდათიდან ჩამოყვანილი ძაღლი,“ „ნაცემი ძაღლი,“ „ნეიროქირურგებმა რომ ოპერაცია გაუკეთეს ის“ და ხანდახან უბრალოდ „ის ძაღლი“ – ასე ვეძახით ძაღლს, რომელსაც სახელი არც ჰქონია და არც ახლა აქვს. ძაღლს, რომელიც გადარჩენისთვის ორი დღე იბრძოდა და მაინც მოკვდა, რომელიც ქუჩაში იზრდებოდა და დაჩაგრეს, სცემეს და სასიკვდილოდ გაიმეტეს. ეს ამბავი საქართველოში 2023 წლის დასასრულს მოხდა და იმ ადამიანის ირგვლივ, ვინც ბაღდათში ნაცემი ძაღლი მარტო არ დატოვა, უამრავი სხვაც გაერთიანდა, თუმცა ვერ გადაარჩინეს.
საქართველოში მიუსაფარი ცხოველები ერთ-ერთ ყველაზე მოწყვლად ჯგუფს წარმოადგენენ და ამ მხრივ 2023 წელს არც არაფერი შეცვლილა. მეტიც, ცხოველთა უფლებადამცველები ამბობენ, რომ მიუსაფარი ძაღლების ცხოვრება 2023 წელს წინა წლებთან შედარებით მკვეთრად გაუარესდა. ამას ადასტურებს სოციალურ ქსელებში ყოველდღიურად გავრცელებული დაზარალებული ცხოველების ფოტო-ვიდეო კადრები.
და მათ შორის ვინც მიუსაფარ ცხოველებზე ყოველდღიურად ზრუნავს, არის ზაქარია დოლიძეც, რომელიც საკუთარი ხელით უკეთებს მიუსაფარ ცხოველებს სახლებს. მის მიერ დამზადებულ და ქუჩაში უპატრონო ძაღლებისთვის დადგმულ სახლებს ხშირად იპარავენ, თუმცა ახლა ამაზე არ ვისაუბრებთ…იმისათვის, რომ ზაქარიამ ცხოველებს სახლი გაუკეთოს, ხშირად თავის სახლში სხვადასხვა ნივთს შლის. და შემდეგ ცხოველებთან ეს სახლები თავად მიაქვს იმისათვის, რომ ქუჩაში გაგდებული, დაბადებული თუ უბრალოდ მცხოვრები ძაღლები არ გაიყინონ.
სხვადასხვა კვლევით არის დადასტურებული, რომ საქართველოს მოსახლეობას უსახლკარო ცხოველების ბედი ძალიან ადარდებს. მაგალითად, 2023 წელს NDI-ის კვლევაში ნათქვამია, რომ მოქალაქეთა 22%-ის აზრით, უსახლკარო ცხოველები ადგილობრივი დონის ყველაზე მნიშვნელოვანი გამოწვევაა.
მოქალაქეები დარდობენ ცხოველებზე, ასევე არავაქცინირებული ცხოველის მიერ გავრცელებულ დაავადებებზე, მათ შორის ცოფის შემთხვევებზე, რომლის ათეულობით შემთხვევა 2023 წელსაც გამოვლინდა. ამასთან, არსებობს ისეთი ინფექციებიც, რომლებიც ცხოველიდან ადამიანზე არ გადადის, თუმცა ამ შემთხვევაში რისკის ქვეშ დგებიან სხვა ძაღლები.
აი, მაგალითად, ისინი, ვისაც სახელიც აქვს და თბილი სახლიც და ვინც უყვართ. ვეტერინარულ კლინიკებში მთელი წლის განმავლობაში ათასობით ძაღლს უმკურნალეს და ახალი წლის დღეებშიც ასე გრძელდება. სხვადასხვა დაავადების გამო გამოჯანმრთელებისთვის იბრძვიან ძაღლები და კატები. და მათ გვერდით არიან მათი საუკეთესო მეგობრებიც.
თბილისში, ასევე სხვა ქალაქებსა თუ სოფლებში არ არსებობს ქუჩა, სადაც ერთი მიუსაფარი ცხოველი მაინც არ არის, თუმცა ქვეყანაში უსახლკარო ცხოველების ოფიციალური სტატისტიკა არ გვაქვს. თბილისის ცხოველთა მონიტორინგის სააგენტოს განცხადებით, მათ თბილისის მასშტაბით 2023 წლის გაზაფხულზე აღწერეს მიუსაფარი ცხოველების რაოდენობა და სავარაუდოდ, 2024 წლის იანვარში გახდება ცნობილი ის, თუ რამდენი ძაღლი ცხოვრობს თბილისის ქუჩებში.
