სამხრეთ-დასავლეთ ისლანდიაში ვულკანის ამოფრქვევიდან 24 საათის შემდეგ მაგმა ისევ მოედინება.
ისლანდიის მეტეოროლოგიურ სამსახურში ვარაუდობენ, რომ ორშაბათს ვულკანის ამოფრქვევიდან პირველ 2 საათში ასობით კუბური მეტრი ლავა გადმოვიდა, თუმცა ამჟამად ვულკანის აქტივობა მნიშვნელოვნადაა შემცირებული.
ძლიერი სეისმური აქტივობის გამო ახლომდებარე ქალაქ გრინდავიკიდან მოსახლეობა ნოემბერშივე გაიყვანეს. ახლა მთავარი პრობლემა აირებით დაბინძურებული გარემოა.
მხუთავი აირები მალე შესაძლოა მიუახლოვდეს ისლანდიის დედაქალაქ რეიკიავიკს, რომელიც გრინდავიკიდან 42 კილომეტრში მდებარეობს. უკვე იგრძნობა დამწვრის სუნი, ჩანს ფერფლიც, თუმცა ვულკანოლოგები საფრთხეს ვერ ხედავენ.
ისლანდიის უნივერსიტეტის ვულკანოლოგი ჰელგა ტორფადოტირი ამბობს, რომ ეს ისლანდიაში მორიგი ამოფრქვევაა, რომელიც ორშაბათს ღამით დაიწყო, ის ნელ-ნელა მშვიდდება. მისი თქმით, არავინ იცის, რამდენ ხანს გაგრძელდება ამოფრქვევა.
ისლანდიაში ყველაზე მასშტაბური ვულკანური მოვლენა 2010 წელს იყო, როდესაც ვულკანი ეიაფიადლაიეკუდლი ამოიფრქვა და წარმოქმნა ფერფლის უზარმაზარი ღრუბელი, რამაც ევროპაში საჰაერო სივრცეების დაკეტვა გამოიწვია.
