ევროპარლამენტის წევრებმა მიიღეს რეზოლუცია, რომელშიც საუბარია რუსეთის ფედერაციის საოკუპაციო ძალების მიერ 2023 წლის 6 ნოემბერს საქართველოს მოქალაქეების თამაზ გინტურის მკვლელობისა და ლევან დოთიაშვილის გატაცების შესახებ.
ევროპარლამენტის რეზოლუციის თანახმად, მომხდარი საქართველოს ორი რეგიონის რუსეთის ფედერაციის ჯარების მიერ ოკუპაციის პირდაპირი შედეგია. რეზოლუციის ტექსტში ევროპარლამენტი კიდევ ერთხელ მოუწოდებს მოსკოვს 12 აგვისტოს ცეცხლის შეწყვეტის შესახებ ხელშეკრულებით გათვალისწინებული ვალდებულებების შესრულებისკენ, მათ შორის ევროკავშირის სადამკვირვებლო მისიის მონიტორინგის ოკუპირებულ ტერიტორიებზე დაშვების ჩათვლით.
