საქართველოს ევროკავშირში გაწევრებას, მოქალაქეების მხრიდან მტკიცე მხარდაჭერა აქვს, „საერთაშორისო რესპუბლიკური ინსტიტუტის“ ახალი კვლევის თანახმად, მოქალაქეთა 89% ევროინტეგრაციას უჭერს მხარს.
გამოკითხული მოქალაქეების 34% ევროინტეგრაციის პროცესში მთავარ დაბრკოლებად „პოლიტიკურ არასტაბილურობას“ ასახელებს.
17% კი ამბობს, რომ ამის მიზეზი ასოცირების შეთანხმებით გათვალისწინებული ვალდებულებების შეუსრულებლობაა. ბოლო შვიდ თვეში, ევროინტეგრაციის მხარდამჭერთა რაოდენობა 4%-ით გაიზარდა.
ქვეყნის ნატოში გაწევრებას, კი საქართველოს მოქალაქეთა 80% უჭერს მხარს, მაჩვენებელი სექტემბრიდან დღემდე 2%-ითაა გაზრდილი.
ნატოში გაწევრების შემთხვევაში მთავარ სარგებელს საქართველოს მოსახლეობის 33% უსაფრთხოებაში, 19% კი საზღვრების დაცვაში ხედავს.
კვლევის ფარგლებში, მოქალაქეებს ჰკითხეს აზრი საქართველოში არსებულ პოლიტიკურ პარტიებზეც. მოსახლეობის 42% ამბობს რომ მათ ინტერესს არცერთი პარტია არ ატარებს. ხოლო საქართველოს პოლიტიკურ პარტიებს მოსახლეობის მხოლოდ 13% ენდობა.
გამოკითხვამ აჩვენა, რომ პოლიტიკური პარტიებიდან, მხოლოდ 2-ს ქართულ ოცნებასა და ნაციონალურ მოძრაობას აქვთ მხარდაჭერის 3%-ზე მაღალი მაჩვენებელი. ქართულ ოცნებას მოსახლეობის 19% უჭერს მხარს, ერთიან ნაციონალურ მოძრაობას კი 14%.
„რომელ პარტიას არ დაუჭერდით მხარს არავითარ შემთხვევაში“ – ამ კითხვაზე ყველაზე უარყოფითი შედეგები მმართველ პარტიასა და ერთიან ნაციონალურ მოძრაობას აქვთ. გამოკითხულთა 39% ამბობს, რომ მხარს არ დაუჭერდა ნაციონალურ მოძრაობას, 34% კი ქართულ ოცნებას. ამასთან გამოკითხული მოსახლეობის 68% ფიქრობს რომ ქვეყანა მეტი პოლიტიკური პოლარიზაციისკენ მიდის. 78%-ს პოლიტიკაში მეტი ახალგაზრდის ხილვა სურს. ამასთან მოსახლეობის 57% არ ეთანხმება თბილისის სატრანსპორტო პოლიტიკას.
საქართველოში მმართველობის საუკეთესო ფორმად დემოკრატიას – მოსახლეობის 77% მიიჩნევს, ეს მაჩვენებელი ბოლო 7 თვის განმავლობაში 11%-ითაა გაზრდილი.
საქართველოს ყველაზე მნიშვნელოვან პარტნიორად მოსახლეობის 63% ევროკავშირს, 47% ამერიკის შეერთებულ შტატებს და 27% უკრაინას ასახელებს. მოსახლეობის 87% ფიქრობს რომ საქართველოსთვის ყველაზე დიდ საფრთხეს რუსეთი წარმოადგენს. ქვეყნის მოსახლეობის 76% ფიქრობს, რომ რუსული აგრესია საქართველოს მომართ არ დასრულებულა და ისევ გრძელდება.
მოქალაქეთა 50%-ს არ მოსწონს საქართველოს ხელისუფლების პოლიტიკა რუსეთთან მიმართებაში. რაც შეეხებათ რუსეთის იმ მოქალაქეებს, რომლებიც საქართველოში ცხოვრობენ – გამოკითხულთა 29%-ს ურჩევნია რომ რუსეთის მოქალაქეები საქართველოდან წავიდნენ, ხოლო 37% ფიქრობს რომ ისინი საქართველოში არ უნდა შემოუშვან მანამ, სანამ ოკუპირებულ ტერიტორიებს არ დაგვიბრუნებენ. გამოკითხვამ აჩვენა ისიც, რომ 46% გარკვეულწილად ეწინააღმდეგება რუსეთთან პირდაპირი ფრენების აღდგენას, ხოლო 48% ამ აზრს ნაწილობრივ ემხრობა.
კითხვაზე როგორია საქართველოს მთავრობის საგარეო პოლიტიკური კურსი, გამოკითხულთა ყველაზე დიდი ნაწილი, 25%, პრორუსულს ასახელებს. 20%-ის აზრით კი მთავრობის კურსი უფრო მეტად პრორუსულია, ვიდრე პროდასავლური.
კვლევის შედეგად ასევე დადგინდა, რომ მოსახლეობის 62% იზ აზრით ქვეყანა არასწორი მიმართულებით მიდის.
„საზოგადოებრივი აზრის ახალი კვლევა“ 2023 წლის 4-23 მარტის პერიოდში, პირდაპირი ინტერვიუს გზით ჩატარდა და გამოკითხეს 18 წელს ზემოთ მოქალაქეები. კვლევა USAID-ის დაფინანსებით ჩატარდა და მისი შედეგების ცდომილება 2,5%-ია.
ანანო ღუდუშაური
