ადამიანის უფლებათა ცენტრმა ანალიტიკური დოკუმენტის პრეზენტაცია გამართა, რომელიც დეპუტატების წინააღმდეგ მიმდინარე სისხლის სამართლის საქმეებს ეხება. დოკუმენტში მიმოხილულია სხვადასხვა ოპოზიციონერი პოლიტიკოსის, მათ შორის, ნიკა მელიას, ბადრი ჯაფარიძისა და ლევან ხაბეიშვილის სისხლის სამართლის საქმეები.
დოკუმენტის მიხედვით, შეგროვებულმა ინფორმაციამ ცხადყო, რომ საქართველოში, ბოლო წლების განმავლობაში, რამდენიმე ოპოზიციური პარტიის ლიდერისა და პარლამენტის წევრის წინააღმდეგ დაწყებული სისხლის სამართლებრივი დევნა, კვლავ აქტუალურს ხდის საგამოძიებო ორგანოებისა და სასამართლო ხელისუფლების მიუკერძოებლობის, დამოუკიდებლობისა და სანდოობის საკითხებს.
