ლონდონის ჰითროუს აეროპორტში ტვირთის გეგმიური შემოწმების შედეგად სასაზღვრო სამსახურის თანამშრომლებმა მცირე რაოდენობით რადიოაქტიური ნივთიერება ურანი აღმოაჩინეს. კონტრტერორისტულმა სამსახურმა გამოძიება დაიწყო. ჯერჯერობით დაკავებული არავინაა.
ბრიტანეთის არმიის ქიმიური იარაღის განყოფილების ყოფილი უფროსი ჰემიშ დე ბრეტონ-გორდონი აღნიშნავს, რომ ურანისა და პლუტონიუმის გადატანა მხოლოდ სპეციალური, მკაცრად დაცული კონტეინერებითაა შესაძლებელი, ზოგჯერ საჰაერო გზითაც შეიძლება, თუმცა კომერციული თვითმფრინავით რადიოაქტიური მასალის გადატანა კატეგორიულად დაუშვებელია.
ბრიტანულ მედიაში გავრცელებული ინფორმაციით, რადიოაქტიური მასალა ჯართში აღმოაჩინეს. ტვირთი თავდაპირველად პაკისტანიდან გამოაგზავნეს, ლონდონში კი საჰაერო გზით ომანიდან მოხვდა.
