დიდი ბრიტანეთის პრემიერ-მინისტრმა ენდი ბერნემმა 8 ოქტომბერს, გერმანიაში მისი პირველი ოფიციალური ვიზიტის ფარგლებში, კანცლერ ფრიდრიხ მერცთან პირისპირ მოლაპარაკებები გამართა. შეხვედრის მთავარი თემები კიბერუსაფრთხოება და რუსეთის მხრიდან მომდინარე ჰიბრიდული საფრთხეები იყო.
ბერლინში ჩასვლის შემდეგ კანცლერის უწყებაში ბერნემს სამხედრო პატივით დახვდნენ
ორმა ლიდერმა ასევე ოფიციალურად მოაწერა ხელი გერმანია-ბრიტანეთის მეგობრობის ხელშეკრულებას, რომელიც 2025 წელს იქნა შეთანხმებული. დოკუმენტი ორივე ქვეყანას ავალდებულებს, უფრო მჭიდროდ ითანამშრომლონ თავდაცვის, უსაფრთხოების, მეცნიერების, ტექნოლოგიებისა და ეკონომიკური ზრდის სფეროებში.
„კენსინგტონის ხელშეკრულების“ სახელით ცნობილი 27-გვერდიანი დოკუმენტი განსაზღვრავს 17-პუნქტიან სამოქმედო გეგმას უფრო მჭიდრო თანამშრომლობისთვის „ბრექსიტის“ შემდგომ პერიოდში, როდესაც დიდი ბრიტანეთი აღარ არის ევროკავშირის წევრი.
ბერნემმა განაცხადა, რომ ხელშეკრულება არა მხოლოდ „გააუმჯობესებს მათ უსაფრთხოებას ევროპაში, არამედ ხელს შეუწყობს ეკონომიკისა და ცხოვრების დონის ზრდას.
„დღეს ვაცხადებთ, რომ ვითანამშრომლებთ სხვადასხვა დონეზე, განსაკუთრებით თავდაცვისა და უსაფრთხოების სფეროში, ეს არის ახალი პარტნიორობა ჰიბრიდულ თავდასხმებთან გასამკლავებლად. ეს არის გამოწვევა, რომელსაც დიდი ბრიტანეთი და გერმანია რეგულარულად აწყდებიან, ამიტომ ლოგიკურია, რომ ამ საფრთხეებს ერთობლივად ვუპასუხოთ და ერთმანეთს მხარი დავუჭიროთ მათთან ბრძოლაში, მათ შორის, ჩვენს დემოკრატიულ პროცესებში ჩარევის აღკვეთის კუთხითაც“. - განაცხადა დიდი ბრიტანეთის პრემიერ-მინისტრმა, ენდი ბერნემმა.
„ევროკავშირიდან გაერთიანებული სამეფოს სამწუხარო გასვლის შემდეგ ჩვენ ახლა ორმხრივ შეთანხმებას ვაფორმებთ. ეს შეთანხმება, რომელიც გაერთიანებულ სამეფოსა და გერმანიას შორის თანამშრომლობის მრავალ ასპექტს მოიცავს, უპირველეს ყოვლისა, სტუდენტებს სთავაზობს ჩვენს ქვეყნებში გადაადგილების გაუმჯობესებულ შესაძლებლობებს, გაერთიანებულ სამეფოსა და გერმანიაში ვიზის გარეშე შესვლასა და ყოფნის უფლებას, მათ შორის ხანგრძლივი ვიზიტებისა და სტუდენტთა გაცვლითი პროგრამებისთვის“. - განაცხადა გერმანიის კანცლერმა, ფრიდრიხ მერცმა.
ბერლინში ვიზიტი იმ ფონზე მიმდინარეობს, როდესაც ბერნემს ევროკავშირთან ბრიტანეთის სამომავლო ურთიერთობების შესახებ კითხვებზე პასუხის გაცემა უწევს.