ზუსტად 31 წლის წინ 31 მარტს, საქართველოს მოსახლეობამ, რეფერენდუმის გზით გადაწყვიტა საქართველოს დამოუკიდებლობის აღდგენა.
კითხვაზე – „თანახმა ხართ თუ არა, აღდგეს საქართველოს სახელმწიფოებრივი დამოუკიდებლობა 1918 წლის 26 მაისის დამოუკიდებლობის აქტის საფუძველზე?” რეფერენდუმის მონაწილეთა 99,08 %-მა უპასუხა „დიახ“.
სწორედ ეს რეფერენდუმი იყო ერთ-ერთი მთავარი ნაბიჯი, საბჭოთა 70-თ წლიანი ოკუპაციისგან გასათავისუფლებლად. საქართველოს სახელმწიფოებრივი დამოუკიდებლობის აღდგენას ხმა მისცა 3 მილიონ 295 ათას 500-მა მოქალაქემ. ანუ, საქართველოში რეგისტრირებულ ამომრჩეველთა თითქმის 91-მა პროცენტმა.
საქართველოს კონსტიტუციით დაცული სუვერენიტეტი სწორედ 31 მარტის რეფერენდუმს ეყრდნობა. 31 წლის წინ, რეფერენდუმის დღეს, საქართველოში იყო ამერიკის შეერთებული შტატების 37-ე პრეზიდენტი რიჩარდ ნიქსონი. მან ერთ-ერთ საარჩევნო უბანზე ყოფნისას თქვა – უფლება რომ მქონდეს სიამოვნებით მივცემდი ხმას საქართველოს დამოუკიდებლობასო.
საბოლოოდ, სწორედ ამ რეფერენდუმის საფუძველზე, საქართველომ დამოუკიდებლობა აღიდგინა 1991 წლის 9 აპრილს.
დღეს, “ევრონიუს ჯორჯიასთან” ისაუბრეს იმ მოქალაქეებმა, რომელთაც ზუსტად 31 წლის წინ, ამ დღეს დამოუკიდებლობის აღდგენის რეფერენდუმში მიიღეს მონაწილეობა.
