არგენტინის პრეზიდენტმა ხავიერ მილეიმ გუშინ როკვარსკვლავის ამპლუა მოირგო და ბუენოს-აირესის Movistar Arena-ს სცენაზე ათიათასობით მხარდამჭერის წინაშე როკჰიტებითა და ცეკვით წარდგა. ამ უცნაურ ფორმატში პრეზიდენტმა თავისი ახალი წიგნი „ეკონომიკური სასწაული“ წარმოადგინა.
სცენიდან მილეი მღეროდა, აკრიტიკებდა წინამორბედებსა და პოლიტიკურ ოპონენტებს, ხოლო დარბაზში პერიოდულად ისმოდა მის მიმართ მხარდაჭერის შეძახილები. საღამოს განმავლობაში პრეზიდენტმა რამდენიმე მუსიკალური ნომერი მიუძღვნა საერთაშორისო მოვლენებსაც – მათ შორის, ღაზის სექტორში მიმდინარე კონფლიქტს, სადაც მან „ჰამასის” მიერ დაკავებული მძევლების გათავისუფლება მოითხოვა.
მილეი სცენაზე ასრულებდა პოპულარულ როკსიმღერებს შეცვლილი ტექსტით, რომელშიც საკუთარ თავს „ყველაზე დიდ ლიბერალად“ მოიხსენიებდა და ამტკიცებდა, რომ „მას ვერავინ შეაჩერებს“. პრეზიდენტმა ასევე მკვეთრად გააკრიტიკა მემარცხენე ძალები და მათ ბრალი დასდო კონსერვატორი აქტივისტის, ჩარლი კირკის, წინააღმდეგ განხორციელებულ თავდასხმასა და აშშ-ის ყოფილი პრეზიდენტის, დონალდ ტრამპის, წინააღმდეგ მიმართული მკვლელობის მცდელობების მხარდაჭერაში.
მილეის შოუს პარალელურად, Movistar Arena-ს გარეთ გაიმართა მასშტაბური საპროტესტო აქცია, სადაც მოქალაქეები მის ეკონომიკურ პოლიტიკასა და მთავრობის გადაწყვეტილებებს აპროტესტებდნენ.
