პოლონეთის პრემიერ-მინისტრი აცხადებს, რომ პოლონეთის სახელმწიფო დაცვის სამსახურმა ვარშავის თავზე მფრინავი დრონი გაანეიტრალა. ამის შესახებ დონალდ ტუსკმა სოციალურ პლატფორმა X-ზე დაწერა. პოლონეთის პრემიერის ცნობით, მომხდართან დაკავშირებით სამართალდამცველებმა ბელარუსის ორი მოქალაქე დააკავეს.
Przed chwilą Służba Ochrony Państwa zneutralizowała drona operującego nad budynkami rządowymi (Parkowa) i Belwederem. Zatrzymano dwóch obywateli Białorusi. Policja bada okoliczności incydentu.
— Donald Tusk (@donaldtusk) September 15, 2025
„ცოტა ხნის წინ სახელმწიფო დაცვის სამსახურმა გაანეიტრალა დრონი, რომელიც სამთავრობო შენობებისა და ბელვედერის თავზე მოქმედებდა. დაკავებულია ბელარუსის ორი მოქალაქე. პოლიცია ინციდენტთან დაკავშირებულ გარემოებებს იძიებს“, – წერს დონალდ ტუსკი.
მიმდინარე თვეს ეს მეორე შემთხვევაა, როდესაც პოლონეთის სახელმწიფო დაცვის სამსახურმა უცხო ქვეყნის დრონები გაანეიტრალეს.
პოლონეთის საჰაერო სივრცე, 10 სექტემბრის ღამეს დაარღვია 19-მა რუსულმა დრონმა, რომელთა მნიშვნელოვანი ნაწილი ბელარუსიდან შეფრინდა.
დრონების მოგერიებაში, პოლონური თვითმფრინავების გარდა NATO-ს სხვა ქვეყნების გამანადგურებლებიც ჩაერთნენ. დრონის ნამსხვრევები ბელარუსისა და უკრაინის საზღვართან ახლოს საცხოვრებელ შენობას დაეცა.
