არგენტინაში პროფკავშირებმა საყოველთაო გაფიცვა გამოაცხადეს, რამაც ქვეყნის პარალიზება გამოიწვია. შეფერხდა მატარებლებისა და საზოგადოებრივი ტრანსპორტის მოძრაობა, გაუქმდა ფრენები, შეწყდა მარცვლეულის ტრანსპორტირება და ბანკები დაიხურა.
გაფიცვა პრეზიდენტ ხავიერ მილეის ლიბერტარიანული მთავრობის წინააღმდეგ გაიმართა. ეს იყო ერთდღიანი გაფიცვა, რომელიც მილეის პრეზიდენტობის მე-16 თვეს მოეწყო — ამ პერიოდის განმავლობაში პრეზიდენტი მკაცრი ეკონომიური გადაწყვეტილებებით ცდილობდა ქვეყნის ბიუჯეტის დეფიციტის აღმოფხვრას.
აეროპორტები დაცარიელდა, რადგან წამყვანმა ავიაკომპანიებმა ფრენები გააუქმეს. ბევრი საავადმყოფო მხოლოდ გადაუდებელ შემთხვევებზე მუშაობდა. მთავრობის ინფორმაციით, ამ ერთდღიანმა გაჩერებამ ქვეყნის ეკონომიკა დაახლოებით 880 მილიონი დოლარით დააზარალა.
გაფიცვის წინა დღეს პროფკავშირების აქტივისტები შეუერთდნენ პენსიონერთა ყოველკვირეულ აქციას, რომელზეც ისინი პენსიების გაზრდას ითხოვდნენ. ამჟამად არგენტინაში პენსიების საშუალო ოდენობა დაახლოებით 300 დოლარის ეკვივალენტია.
ბუენოს-აირესის ბევრ უბანში კაფეები და ტანსაცმლის მაღაზიები ჩვეულებრივ მუშაობდნენ.
თავად არგენტინის პრეზიდენტი ხავიერ მილეი შეუპოვრად გამოიყურებოდა — დილიდან მან სოციალურ მედიაში არაერთი პოსტი გააზიარა, რომ აშშ-ის ყოფილი ფინანსთა მინისტრი სკოტ ბესენტი მომავალ კვირას არგენტინას ეწვევა.
ხავიერ მილეიმ გააუქმა როგორც სუბსიდიები, ისე არაერთი სამინისტრო და გაათავისუფლა 42,000-ზე მეტი საჯარო მოხელე. ხარჯების შეკვეცის შედეგები მოსახლეობაზე მყისიერად აისახა — მთავრობის ბიუჯეტს ძირითადად სოციალური პროგრამების შემცირებით ზოგავენ.
არგენტინაში მოსახლეობა ითხოვს, მთავრობამ გაზარდოს ბიუჯეტი ჯანდაცვისა და განათლების სფეროებში, დააბრუნოს გათავისუფლებული თანამშრომლები სამსახურებში და განაახლოს მოლაპარაკებები ხელფასების მომატებაზე.
