საჰაერო მოძრაობის მართვის კომპიუტერულ სისტემაში ტექნიკური პრობლემის გამო ბელგიის საჰაერო სივრცე ერთ საათზე მეტი ხნით იყო დაკეტილი.
შეჩერდა ფრენები ქვეყნის მთავარი აეროპორტებიდან. ორი თვითმფრინავი ლილის აეროპორტში დაეშვა. პროგრამული უზრუნველყოფის წარმომადგენელი აცხადებს, რომ სისტემა გადატვირთეს და საჰაერო სივრცეც უკვე გაიხსნა.
UPDATE – Air traffic in Belgium almost to full capacity
After the technical problem at air traffic control this afternoon, air traffic in Belgium is now getting back to full capacity. There may still be slight flight delays, so we recommend following your flight information >… pic.twitter.com/eXcmZs8OBR— Brussels Airport (@BrusselsAirport) January 30, 2025
ბრიუსელის აეროპორტში აცხადებენ, რომ მცირე შეფერხება შესაძლოა კვლავ იყოს, სანამ ვითარება ბოლომდე არ გამოსწორდება. სისტემის გათიშვის გამო თვითმფრინავი, რომელშიც სლოვაკეთის პრემიერ-მინისტრი რობერტ ფიცო იმყოფებოდა, უკან დაბრუნდა.
ფიცო ბრიუსელში ევროკავშირის ოფიციალურ პირებთან შესახვედრად მიემგზავრებოდა. როგორც ცნობილია, მისი ხედვა რუსეთთან დაკავშირებით განსხვავებულია ევროკავშირის პოზიციისგან.
როდესაც რობერტ ფიცოს პარტიამ 2023 წელს საპარლამენტო არჩევნებში გაიმარჯვა, იგი ხელისუფლებაში დაბრუნდა. მან უკრაინას შეუწყვიტა სამხედრო დახმარება, გააკრიტიკა ევროკავშირი რუსეთისთვის სანქციების დაწესების გამო და პირობა დადო, რომ დაბლოკავს უკრაინას ნატოში გაწევრებას. ის ასევე ეწინააღმდეგება უკრაინის გადაწყვეტილებას ევროპაში რუსული ენერგოექსპორტის შეწყვეტასთან დაკავშირებით.
