რუსეთის სახელმწიფო დუმამ პირველი მოსმენით მიიღო კანონპროექტი, რომელიც ე.წ. უცხოეთის აგენტებს ჰონორარის მიღების შესაძლებლობას უზღუდავს.
ამ სტატუსის მქონე პირებს მოეთხოვებათ რუბლის სპეციალური ანგარიშის გახსნა, სადაც შემოქმედებითი საქმიანობიდან მიღებული შემოსავალი ჩაირიცხება.
გარდა ამისა, კანონი ითვალისწინებს „სასამართლოს გადაწყვეტილებით“ ანგარიშიდან თანხის ამოღებას სახელმწიფო ბიუჯეტის სასარგებლოდ.
წელსვე რუსეთმა მიიღო კანონი, რომელიც რუსეთის მოქალაქეებს და კომპანიებს უკრძალავს ე.წ. უცხოეთის აგენტების საინფორმაციო რესურსებზე რეკლამის განთავსებას, ასევე თავად ამ რესურსების რეკლამირებას.
რუსეთის ხელისუფლებას „უცხოეთის აგენტად“ ნებისმიერი პირის გამოცხადება შეუძლია, ვისზეც ჩათვლის, რომ „უცხოეთის გავლენის ქვეშაა“.
აგენტების შესახებ კანონი რუსეთის დუმამ 2012 წელს მიიღო. თავდაპირველად, ის გარკვეულ ორგანიზაციებს ეხებოდა.
დროთა განმავლობაში კი კანონმა რეპრესიული ხასიათი მიიღო და ის გავრცელდა ფიზიკურ პირებზე, პოლიტიკურ პარტიებზე, მწერლებზე, მხატვრებსა თუ ბლოგერებზე.
