კრემლის საოკუპაციო ძალები განაგრძობენ უკრაინის ქალაქებსა და რეგიონებზე იერიშების მიტანას. რუსული დრონების სამიზნე ამჯერად ზაპოროჟია და შავი ზღვის საპორტო ქალაქი ოდესა გახდა. არიან დაშავებულებიც, თუმცა მსხვერპლის შესახებ ინფორმაცია ჯერჯერობით არ ვრცელდება. დაზიანებულია როგორც სამოქალაქო, ისე სატრანსპორტო და ენერგეტიკული ინფრასტრუქტურა.
უკრაინის სახელმწიფო საგანგებო სიტუაციების სამსახურმა განაცხადა, რომ საცხოვრებელი შენობის რამდენიმე სართული სრულად დაიწვა. მათ შენობის ზედა სართულებიდან ხუთი ადამიანის გამოყვანა შეძლეს, სამი პირი კი, სამედიცინო დახმარების გასაწევად საავადმყოფოში გადაიყვანეს.
სამსახურის მიერ გავრცელებულ ვიდეოში ჩანს, როგორ ებრძვიან ხანძრის კერებს მეხანძრეები და როგორ გაჰყავთ შემთხვევის ადგილიდან მოსახლეობა. რუსეთის თავდასხმის გამო მთელ რეგიონში დროებით გაითიშა ელექტროენერგია, ასევე დააზიანა კომერციული ობიექტი.
უკრაინის საჰაერო ძალების ცნობით, რუსეთმა 16 დეკემბერს უკრაინის მიმართულებით 69 დრონი გაუშვა, რომელთაგან 57 საჰაერო თავდაცვის ძალებმა გაანეიტრალეს.
რუსეთმა შავი ზღვის საპორტო ქალაქ ოდესაზეც მიიტანა იერიში, რამაც საყოფაცხოვრებო ტექნიკის საწყობებში მასშტაბური ხანძარი გამოიწვია. რუსული სადესანტო დრონების თავდასხმამ ასევე დააზიანა სამოქალაქო და სატრანსპორტო ინფრასტრუქტურა.
სახელმწიფო საგანგებო სიტუაციების სამსახურმა განაცხადა, რომ დარტყმის შედეგების აღმოფხვრის ძალისხმევას განმეორებითი საჰაერო განგაში ართულებდა. დაღუპულთა შესახებ ინფორმაცია არ გავრცელებულა.
„რუსეთმა ღამით ოდესას დრონებით შეუტია. თავდასხმის შედეგად საყოფაცხოვრებო ტექნიკის საწყობებში მასშტაბური ხანძარი გაჩნდა. საბედნიეროდ, დაშავებულები და დაღუპულები არ არიან. ხანძრის ლოკალიზების პროცესი განმეორებითი საჰაერო განგაშის გამო გართულდა. მაშველებიც კი იძულებული გახდნენ, თავი შეეფარებინათ. ხანძრის ქრობის პროცესში ჩართული იყვნენ უკრაინის ეროვნული გვარდიის სახანძრო დანაყოფები, 60-ზე მეტი მეხანძრე და 20 ერთეული ტექნიკა”, – აცხადებს ოდესის სახელმწიფო საგანგებო სიტუაციების სამსახურის პრესსპიკერი მარინა ავერინა.
15 დეკემბერს ქალაქის ენერგეტიკული ინფრასტრუქტურა რუსეთის საჰაერო დარტყმის სამიზნე გახდა. ამის გამო ათასობით ადამიანი ელექტროენერგიის გარეშე დარჩა. ელექტროენერგიის მიწოდება 330 000 აბონენტს 16 დეკემბერს, დღის მეორე ნახევარში, აღუდგა.
2022 წლის დასაწყისში უკრაინაში სრულმასშტაბიანი შეჭრის შემდეგ რუსეთი უკრაინის ენერგეტიკულ ინფრასტრუქტურას გამუდმებით ესხმის თავს, რაც მთელ ქვეყანაში ელექტროენერგიის გათიშვის მიზეზი ხდება. განსაკუთრებით რთული ზამთრის პერიოდია, როდესაც კრემლი მილიონობით უკრაინელს ელექტროენერგიისა და გათბობის გარეშე ტოვებს.
