უკრაინის პრეზიდენტის ადმინისტრაციის უფროსი, ანდრეი ერმაკი, თანამდებობიდან გადადგა მას შემდეგ, რაც უკრაინის ანტიკორუფციულმა ბიურომ (NABU) კორუფციული საქმის ფარგლებში ჩხრეკა ჩაატარა მის გარემოცვასთან დაკავშირებულ ობიექტებში.
პრეზიდენტმა ვოლოდიმირ ზელენსკიმ განაცხადა, რომ ახლა მთავარი ყურადღება მხოლოდ უკრაინის დაცვაზე უნდა იყოს კონცენტრირებული. მისი თქმით, ამის უზრუნველსაყოფად საჭიროა სამთავრობო სტრუქტურების რეორგანიზაცია, რის ნაწილიც გახდა ერმაკის გადადგომა.
„მადლობელი ვარ ანდრეის, რომ მოლაპარაკებების პროცესში უკრაინის პოზიციას ყოველთვის ზუსტად და ღირსეულად წარმოადგენდა,“ – თქვა ზელენსკიმ.
ანდრეი ერმაკი და ვოლოდიმირ ზელენსკი ერთმანეთს ზელენსკის პრეზიდენტობამდე დიდი ხნით ადრე იცნობდნენ.
.
ადვოკატი და კინოპროდიუსერი ერმაკი ზელენსკის სტუდიაში „კვარტალი 95“ მუშაობდა და უკრაინის ახლანდელ პრეზიდენტს იურიდიულ მომსახურებას უწევდა. მან ასევე დააარსა „გარნეტ მედია ჯგუფი“, რომელიც უკრაინულ ფილმებსა და სატელევიზიო შოუებს აწარმოებდა.
როდესაც ზელენსკი 2019 წელს პრეზიდენტი გახდა, ერმაკი მის საგარეო პოლიტიკის მრჩევლად დაინიშნა.
2014 წელს, როცა მოსკოვი უკრაინაში შეიჭრა, მას რუსეთთან პატიმრების გაცვლის შესახებ მოლაპარაკებები დაევალა. ის ასევე აშშ-სთან კომუნიკაციებს კურირებდა.
2020 წლის თებერვალში ზელენსკიმ ის თავის ადმინისტრაციის უფროსად დანიშნა, რაც უკრაინაში ერთ-ერთი ყველაზე გავლენიანი თანამდებობაა. ერმაკის ძირითადი ყურადღება აღმოსავლეთ უკრაინაში რუსეთის ომზე იყო გამახვილებული.
ერმაკს ხშირად მოიხსენიებენ, როგორც ზელენსკის „მარჯვენა ხელი“, მკაცრი მენეჯერი და ასევე უკრაინის საგარეო და უსაფრთხოების პოლიტიკის მთავარი არქიტექტორი.
ზოგიერთი მას აკრიტიკებს, თუმცა უკრაინასა და დასავლეთში მას ძირითადად აღიქვამენ როგორც ეფექტურ და აქტიურ დიპლომატს.
ანდრეი ერმაკმა ცოტა ხნის წინ უხელმძღვანელა უკრაინის დელეგაციას ჟენევაში, შეერთებულ შტატებთან მოლაპარაკებებში, უკრაინაში მიმდინარე რუსეთის ომის პოტენციური მოგვარების შესახებ.
