უკრაინის პრეზიდენტის ოფისის თანახმად, მათ გადაეცათ აშშ-ის მიერ შემუშავებული „ომის დასრულების გეგმა“, რომელსაც, ამერიკული მხარის შეფასებით, „დიპლომატიის გააქტიურება შეუძლია“.
გეგმის განხილვას ვოლოდიმირ ზელენსკი, დონალდ ტრამპთან უახლოეს დღეებში აპირებს.
განცხადებაში, რომელსაც უკრაინის პრეზიდენტის ოფისი ავრცელებს ნათქვამია, რომ კიევი „რუსული შემოჭრის პირველივე წამებიდან მშვიდობისკენ მიისწრაფვის, ყველა შინაარსიან წინადადებას ვუჭერთ მხარს, რომელსაც ნამდვილი მშვიდობის მოტანა შეუძლია“.
კიევში ამბობენ, რომ „უკრაინა წლის დასაწყისიდან მხარს უჭერდა პრეზიდენტ ტრამპის წინადადებებს, რათა სისხლისღვრა დასრულებულიყო“. მათივე განცხადებით, მშვიდობის მისაღწევად, ახლაც მზად არიან კონსტრუქციულად იმუშაონ ამერიკულ მხარესთან და სხვა პარტნიორებთან ევროპასა და მსოფლიოში.
