ევროკავშირი აღარ გასცემს მრავალჯერად ვიზებს რუსეთის მოქალაქეებზე, მოსკოვზე ზეწოლის გასაძლიერებლად.
„ამიერიდან რუსეთის მოქალაქეებს აღარ შეეძლებათ მრავალჯერადი ვიზების მიღება. ეს ნიშნავს, რომ რუსეთის მოქალაქეებს მოუწევთ ახალ ვიზაზე განაცხადის შეტანა ყოველ ჯერზე, როდესაც ისინი ევროკავშირში მოგზაურობას გეგმავენ“, – ნათქვამია ბრიუსელის განცხადებაში.
ევროკომისიის ვიცე-პრეზიდენტმა ჰენა ვირკუნენმა განაცხადა, რომ ეს ნაბიჯი მიზნად ისახავს რუსეთის „საბოტაჟის, დეზინფორმაციისა და დრონების შემოჭრის“ შეზღუდვას.
რუსმა დამკვირვებლებმა გააკრიტიკეს ეს გადაწყვეტილება. მათი თქმით, რეგულაცია გავლენას მოახდენს რიგით მოქალაქეებზე, რომლებსაც არანაირი კავშირი არ აქვთ პრეზიდენტ ვლადიმერ პუტინთან.
რუსების მიერ წარდგენილი ვიზების განაცხადები დაექვემდებარება „გაძლიერებულ შემოწმებას“ და „შემოწმების მაღალ დონეს“, განაცხადა შინაგან საქმეთა და მიგრაციის საკითხებში ევროკომისარმა მაგნუს ბრუნერმა.
გამონაკლისები მხოლოდ შეზღუდულ ჰუმანიტარულ შემთხვევებში გავრცელდება, როგორიცაა დამოუკიდებელი ჟურნალისტები, დისიდენტები და ადამიანის უფლებათა დამცველები. რუსებზე, რომლებსაც ასევე აქვთ ევროკავშირის წევრი სახელმწიფოს მოქალაქეობა, ეს რეგულაციები არ იმოქმედებს.
„ევროკავშირში მოგზაურობა და თავისუფალი გადაადგილება პრივილეგიაა და არა მოცემულობა“, – განაცხადა ევროკავშირის საგარეო პოლიტიკის ხელმძღვანელმა კაია კალასმა.
ევროკომისიის მონაცემებით, რუსეთის მოქალაქეებმა 2025 წელს დაახლოებით 552 000 შენგენის ვიზა მიიღეს, რაც თითქმის 100 000-ით მეტია გასულ წელთან შედარებით, მაგრამ გაცილებით ნაკლებია 2019 წელს გაცემულ 4 მილიონზე. ვიზების უმეტესობა იტალიამ, საფრანგეთმა და ესპანეთმა გასცეს.
ევროკომისია დეკემბერში ახალი სტრატეგიის გამოქვეყნებას გეგმავს, რომელშიც აღწერილი იქნება, თუ როგორ შეიძლება ვიზების პოლიტიკამ იმოქმედოს რუსეთის გავლენის წინააღმდეგ საბრძოლველად და ევროკავშირის გარე უსაფრთხოების გასაძლიერებლად.
„როგორც ჩანს, ევროპას არ სჭირდება გადახდისუნარიანი ტურისტები”, – განაცხადა რუსეთის საგარეო საქმეთა სამინისტროს პრესსპიკერმა მარია ზახაროვამ.
