„უნგრეთის პრემიერ-მინისტრი ვიქტორ ორბანი პარასკევს, 7 ნოემბერს, თეთრ სახლში აშშ-ის პრეზიდენტ დონალდ ტრამპს შეხვდება” – ამბობს ქვეყნის საგარეო მინისტრი პიტერ სიიარტო. მისი თქმით, შეხვედრის მთავარი თემები იქნება უკრაინაში მშვიდობის პერსპექტივები და უნგრეთის ენერგეტიკული უსაფრთხოება.
პიტერ სიიარტოს არ უხსენებია, თუმცა დიდი ალბათობით ორბანი ასევე გეგმავს აშშ-ის ადმინისტრაციის დარწმუნებას, რომ ქვეყანას რუსული ნავთობის შეძენის გაგრძელების უფლება მისცეს, მიუხედავად ევროკავშირისა და ვაშინგტონის ზეწოლისა, რომელიც მიზნად ისახავს ბუდაპეშტის დამოკიდებულების შემცირებას მოსკოვის ენერგორესურსებზე.
ოფიციალური ვიზიტის დროს განიხილება ეკონომიკური და ენერგეტიკული თანამშრომლობის ახალი პაკეტიც. ორბანს ვაშინგტონში თან ახლავს მისი კაბინეტის წევრები და უნგრელი ბიზნესლიდერები, ხოლო შეხვედრის შედეგად ის აშშ-ის ინვესტიციების ზრდას ელოდება.
