რუსეთის სახელმწიფო სათათბირომ ხუთშაბათს, 25 სექტემბერს, მესამე და საბოლოო მოსმენით დაამტკიცა კანონპროექტი, რომელიც სამართალდამცავ ორგანოებს საშუალებას აძლევს, უფრო მარტივად წაუყენონ ბრალდება იმ პირებსა და ორგანიზაციებს, რომლებიც „უცხოეთის აგენტების“ იარლიყით არიან ცნობილი.
კანონის ამოქმედების შემდეგ მისი ერთჯერადი დარღვევა უკვე საკმარისი იქნება სისხლის სამართლის პასუხისმგებლობის დასაწესებლად. აქამდე ბრალდების წაყენება მხოლოდ იმ შემთხვევაში შეიძლებოდა, თუ ერთი კალენდარული წლის განმავლობაში ორი დარღვევა დადასტურდებოდა.
კანონპროექტი უკვე მიღებულია სახელმწიფო სათათბიროში და ახლა ფედერაციის საბჭოს დამტკიცებასა და პრეზიდენტ ვლადიმერ პუტინის ხელმოწერას ელოდება.
რუსეთში ხელისუფლება სულ უფრო აქტიურად იყენებს „უცხოელი აგენტის“ იარლიყს – ტერმინს, რომელსაც საბჭოთა ეპოქის მძიმე ასოციაცია ახლავს. „აგენტები“ ვალდებულნი არიან იუსტიციის სამინისტროს წარუდგინონ დეტალური კვარტალური ფინანსური ანგარიშები და თავიანთ ყველა პუბლიკაციასა თუ სოციალურ ქსელში განთავსებულ მასალაზე დაწერონ, რომ „უცხოეთის აგენტები” არიან.
2012 წელს, როდესაც ეს სტატუსი პირველად დამკვიდრდა, თითქმის ასობით პირი, ორგანიზაცია და მედიასაშუალება „უცხოეთის აგენტის“ იარლიყით მონიშნეს.
2022 წელს კანონი გაფართოვდა: უცხოეთის აგენტად გამოცხადების საფუძვლად არა მხოლოდ ფინანსური დახმარება, არამედ ნებისმიერი სახის უცხოური მხარდაჭერა განისაზღვრა. ამ ცვლილებამ ხელისუფლებას მისცა უფლება, სასამართლოს გარეშე დაბლოკოს ვებგვერდები და აუკრძალოს „უცხოეთის აგენტებს“ სახელმწიფო დაფინანსება, არასრულწლოვანებთან მუშაობა და სახელმწიფო უნივერსიტეტებში სწავლება.
2025 წლის აპრილში შეზღუდვები კიდევ უფრო გამკაცრდა. ახალი ნორმებით „უცხოეთის აგენტებად“ შეიძლება გამოცხადდნენ ის პირებიც, რომლებიც სხვებს სამხედრო ინფორმაციის შეგროვებაში რთავენ, თუკი ეს მონაცემები რუსეთის წინააღმდეგ შეიძლება გამოიყენონ. იმავე თვეში ვლადიმერ პუტინმა ხელი მოაწერა კიდევ ერთ კანონსაც, რომელიც უკრძალავს „უცხოეთის აგენტებს“ საგანმანათლებლო ან ცნობიერების ამაღლების ღონისძიებების ორგანიზებას, ადგილობრივი ხელისუფლებისგან მხარდაჭერის მიღებას და სახელმწიფო კორპორაციების მმართველ ორგანოებში მონაწილეობას.
