ამერიკის შეერთებულმა შტატებმა უკრაინისთვის შეიარაღების მიწოდების ახალი პაკეტი დაამტკიცა. უკრაინისთვის გადასაცემი შეიარაღება NATO-ს წევრი ქვეყნების სახსრებით დაფინანსდება – ამის შესახებ ინფორმაციას სააგენტო Reuters ორ ინფორმირებულ წყაროზე დაყრდნობით ავრცელებს.
გამოცემის ცნობით, უკრაინისთვის შეიარაღების მიწოდების ახალი პაკეტის ღირებულება 500 მილიონ აშშ დოლარს შეადგენს და ამისთვის სახსრებს NATO-ს წევრი ქვეყნები გაიღებენ.
ეს პირველი შემთხვევაა, როდესაც მხარეები იყენებენ ახალ მექანიზმს, რომელიც აშშ-მა და მოკავშირეებმა შეიმუშავეს და რაც უკრაინისთვის NATO-ს ქვეყნების სახსრებით ამერიკული მარაგებიდან იარაღის გადაცემას გულისხმობს.
აშშ-ისა და NATO-ს მოკავშირეების მიერ ეს მექანიზმი მიმდინარე წლის აგვისტოში ამოქმედდა და NATO-ს წევრი ქვეყნები დაახლოებით 2 მილიარდი აშშ დოლარის გამოყოფას გეგმავენ.
