სომხეთის საგარეო კურსზე საუბრისას, ქვეყნის პრემიერ-მინისტრი ნიკოლ ფაშინიანი ამბობს, რომ ერევნისთვის „დადგება გადაწყვეტილების დრო, რომელ გაერთიანებაში იყოს – ევროკავშირში თუ ევრაზიულ კავშირში“.
მისი თქმით, „ორივეგან ქვეყნის ერთდროულად წევრობა შეუძლებელია“.
განცხადებას სომხეთის პრემიერ-მინისტრი იმ ფონზე აკეთებს, როდესაც ერევანი ბრიუსელთან აქტიურად მუშაობს ურთიერთობების გაძლიერებაზე და თავად ნიკოლ ფაშინიანი ბოლო თვეების განმავლობაში არაერთხელ შეხვდა ევროკავშირის მაღალჩინოსნებს.
ამასთან, მიმდინარე წლის 4 აპრილს სომხეთის პრეზიდენტმა, ვაჰაგნ ხაჩატურიანმა ხელი მოაწერა კანონს ქვეყნის ევროკავშირში გაწევრების პროცესის დაწყების შესახებ.
ამასთან, სომხეთის პრემიერი განმარტავს, რომ ევრობლოკის სრულფასოვანი წევრობის საკითხი უნდა გადაწყდეს „საყოველთაო რეფერენდუმის გზით“.
