ზაფხულის მაღალ ტემპერატურას პარიზელები და ასევე პარიზში ჩასული ტურისტები მდინარე სენაში ცურვით უმკლავდებიან.
მდინარე სენა სულ უფრო და უფრო პოპულარული ადგილი ხდება ტურისტებისთვის.
გასულ თვეში მდინარე სენაზე საზოგადოებისთვის სამი საბანაო ადგილი გაიხსნა. სენაში ცურვა საუკუნეზე მეტი ხნის განმავლობაში იყო აკრძალული.
„სამსახურში უფროსთან სანაძლეო წავაგე. სწორედ ამიტომ მომიწია სენაში ჩასვლა და ბანაობა, რადგან აქამდე ვამბობდი, რომ აქ არასდროს ჩავიდოდი. თუმცა, ამ ეტაპზე უნდა ვთქვა, რომ აქაურობამ მოლოდინს გადააჭარბა, ყველაფერი ძალიან ლამაზი და სუფთაა“, – ამბობს თურქა ჯეიაკუმარი, ტურისტი ავსტრალიიდან.
ეროვნული მეტეოროლოგიური სამსახური Meteo France აცხადებს, რომ ტემპერატურის მატება მოსალოდნელია 38 გრადუს ცელსიუსამდე, სწორედ ამიტომ ვარაუდობენ, რომ საბანაო ადგილები სენაზე კიდევ უფრო გადატვირთული იქნება.
„წარმოიდგინეთ, ცურავთ და თან ასეთი საოცარი ხედები გაქვთ ეიფელის კოშკზე. წყალი ძალიან სუფთა და უსაფრთხოა. ხალხს ნამდვილად მოსწონს აქ ცურვა და უბრალოდ დასვენება. თითქოს ყველაფრის შესანიშნავი ნაზავია“, – ამბობს კონსტანცე მარტენსი, ტურისტი მექსიკიდან.
პარიზის დასავლეთით მდებარე გრენელის საბანაო ადგილას ვიზიტორები მთელ სიგრძეზე ცურავენ, რუჯს იღებენ და ეიფელის კოშკის უნიკალური ხედებით ტკბებიან.
„აქ, გრენელში, ერთდროულად 200 ადამიანის მიღება შეგვიძლია. ჩვეულებრივ, დღეში 800-დან 1200-მდე სტუმარი გვყავს. გრენელში ბევრი ტურისტი ჩამოდის, რათა დატკბეს ხედებით. ჩვენ კი, მათ საოცარ შესაძლებლობას – ეიფელის კოშკთან ცურვას ვთავაზობთ“, – ამბობს იან ფორეტი, „გრენელის“ სანაპიროს მენეჯერი.
წყლის ხარისხი ყოველდღიურად მოწმდება იმის დასადასტურებლად, რომ ის ევროპულ რეგულაციებს შეესაბამება. ორშაბათს, 11 აგვისტოს, სენაში წყლის ტემპერატურა 22 გრადუსი ცელსიუსი იყო.
10-დან 14 წლამდე ასაკის მოზარდებისთვის აგვისტოს ბოლომდე, მდინარეში ცურვა უფასო იქნება.
პარიზის მერის მოადგილემ, პიერ რაბადანმა, გასული კვირის მონაცემებზე დაყრდნობით განაცხადა, რომ მდინარეზე 40 000-ზე მეტი ვიზიტორი იმყოფებოდა.
საბანაო ტერიტორიას, რა თქმა უნდა, ემსახურება მაშველთა ჯგუფი. ისინი იცავენ წესრიგს და სასტვენებით აცნობებენ მოცურავეებს, რომ არ გადახტნენ, ან არ დატოვონ უსაფრთხო პერიმეტრი.
ჯერჯერობით არანაირი სერიოზული ინციდენტი არ გამოვლენილა.
სენაში ცურვა 1923 წლიდან იყო უკანონო მდინარის დაბინძურების გამო.
საბანაო ადგილების გახსნა შესაძლებელი გახდა 1.4 მილიარდი ევროს ღირებულების დასუფთავების პროექტის შემდეგ.
