მოსკოვში ამერიკული ბირთვული წყალქვეშა ნავების მათ სიახლოვეს განთავსების საკითხს ეხმაურებიან.
„რუსეთი ყურადღებით უდგება ბირთვულ პრობლემატიკასთან დაკავშირებულ საკითხებს”, – აღნიშნავს კრემლის სპიკერი.
დიმიტრი პესკოვის განცხადებით, დონალდ ტრამპის ბოლო განცხადებებითა თუ ქმედებებით არ რჩება შთაბეჭდილება, რომ მხარეებს შორის ესკალაციას აქვს ადგილი. სპიკერის თქმით, რუსეთი ყურადღებით აკვირდება სხვების ბირთვულ რიტორიკას და მიანიშნებს, რომ მოსკოვში შესაძლოა ამ საკითხთან დაკავშირებით ყველას ერთნაირი პოზიცია არ ჰქონდეს.
რუსეთის ტერიტორიასთან ახლოს 2 ამერიკული ბირთვული წყალქვეშა ნავის განთავსებაზე გადაწყვეტილება აშშ-ის პრეზიდენტმა რუსეთის უშიშროების საბჭოს მდივნის, დიმიტრი მედვედევის, ბირთვული რიტორიკის პასუხად მიიღო. აშშ-ის პრეზიდენტმა უკვე დღეს, 4 აგვისტოს, თქვა, რომ „ბირთვული წყალქვეშა ნავები განთავსებულნი არიან იმ რეგიონში, სადაც უნდა იყვნენ”.
„მოცემულ მომენტში ნათელია, რომ ამერიკული წყალქვეშა ნავები ისედაც საომარ მორიგეობაში იმყოფებიან, რაც მუდმივი პროცესია. თუმცა სრულ სურათში, რა თქმა უნდა, ამ პოლემიკაში ჩაბმას არ ვისურვებდი. არ მსურს ამ თემის რაიმე სახით კომენტირება. ჩვენ ბირთვულ პრობლემატიკასთან დაკავშირებულ ნებისმიერ საკითხს სიფრთხილით ვუდგებით, ამ მხრივ რუსეთი იკავებს პასუხისმგებლობიან პოზიციას.
რა თქმა უნდა, ვთვლით, რომ ყველა უნდა იყოს ფრთხილი ბირთვულ რიტორიკასთან დაკავშირებით. ბირთვულ ომს ვერ ეყოლება გამარჯვებული, ამიტომ ესაა ძირითადი პოსტულატი, საიდანაც ამოვდივარ. არ მგონია, რომ ახლა საქმე გვქონდეს რამე ესკალაციასთან, მესმის, რომ საქმე ეხება მგრძნობიარე სუბსტანციებს, რომლებიც დიახ, ბევრის მხრიდან აღიქმება ძალიან ემოციურად. ყველა ქვეყანაში ხელისუფლების წევრები განსხვავებული შეხედულებისანი არიან მიმდინარე მოვლენებთან დაკავშირებით და აქვთ განსხვავებული მიდგომა. არსებობენ ხისტად განწყობილი ადამიანები აშშ-შიც, ევროპულ ქვეყნებშიც, ამიტომ ეს სულ ასე ხდება. მთავარია, პრეზიდენტ პუტინის პოზიცია და ჩვენს ქვეყანაში მოგეხსენებათ საგარეო პოლიტიკას სწორედ სახელმწიფოს მეთაური, ანუ პრეზიდენტი პუტინი განკარგავს”, – აღნიშნა ჟურნალისტებთან საუბრისას დიმიტრი პესკოვმა.
