ლიბანელმა დიზაინერმა ელი სააბმა პარიზის მოდის კვირეულზე წარსულის გაცოცხლება განსაცვიფრებელ სანახაობად აქცია.
ბაროკოს სტილის კლავესინის ფონზე, ქვის კიბეზე მოდელები ისტორიით შთაგონებული სამოსით გამოჩნდნენ. წარმოდგენილი იყო რბილად დაფენილი ველვეტისა და ქვებით მორთული ქსოვილების კომპოზიცია. ელი სააბის ხელწერა უცვლელია – ის ყოველ დეტალში იგრძნობა. მისთვის დამახასიათებელი მდიდრული ქსოვილები, მარგალიტებითა და ძვირფასი თვლებით გაწყობილი ყელსაბამები კვლავ შეუცვლელია.
ფერების პალიტრა ზურმუხტისა და მუქ იასამნისფერ ტონებს შორის მერყეობდა, რაც შუქზე ელვარე მძივებს იდუმალებას სძენდა. განსაკუთრებულ ყურადღებას იპყრობდა მდიდრული კაბები შლეიფებითა და მკვეთრი დეტალებით. ელი სააბმა კიდევ ერთხელ დაამტკიცა, რომ თანმიმდევრულობა ნამდვილად არის დახვეწილი ხელოვნების გამოხატულება.
ელი სააბის მოდა, რომელიც აღმოსავლურ გლამურსა და ევროპულ კლასიკას აერთიანებს, ბოლო ორი ათწლეულის განმავლობაში წითელი ხალიჩის განუყოფელი ნაწილია. ლიბანელი დიზაინერის სახელი დღეს ყველასთვის ცნობილია. მის დახვეწილ სამოსს ხშირად ირგებენ ვარსკვლავები: ანჯელინა ჯოლი, ჰოლი ბერი და ქეით მიდლტონი.
პარიზის მაღალი მოდის კვირეული 10 ივლისს დასრულდა. მსოფლიოს წამყვანმა დიზაინერებმა მოდის ინდუსტრიის მოყვარულებს გაახსენეს, რომ მოდა არის როგორც დროის ანარეკლი, ისე მისი გადალახვის ხელოვნება.
მოდის წლევანდელი კვირეული გამორჩეულად დინამიკური და მრავალფეროვანი იყო. შემოდგომა-ზამთრის კოლექციებში იყო როგორც კლასიკური, ისე ექსპერიმენტული ელემენტები. კვირეულის მთავარი თემა იყო ხელნაკეთი დეტალები, ძველი ეპოქების სილუეტების თანამედროვე ინტერპრეტაცია და მდიდრული ქსოვილების გამოყენება ახალი იდეით.
მოდის კრიტიკოსები ამბობენ, რომ ამ სეზონზე საზოგადოებამ იხილა ერთგვარი დუელი ტრადიციასა და სიახლეს შორის. ზოგმა დიზაინერმა თავისი სათქმელი სტრუქტურული ფორმებით გამოხატა, ზოგმა კი წარსულისა და მომავლის შერწყმა აწმყოში ძველი სტილის გაცოცხლებით მოახერხა.
მოდის კვირეული დასრულდა, თუმცა მოდის მთავარი დევიზი უცვლელი დარჩა – ელეგანტურობის აღქმა შეიძლება შეიცვალოს, მაგრამ ის არასდროს ქრება.
