ირანი აძლიერებს ბირთვულ ზედამხედველობაზე კონტროლს და ცვლის საერთაშორისო ატომური ენერგიის სააგენტოსთან (IAEA) თანამშრომლობის სტრატეგიას. ქვეყნის საგარეო საქმეთა მინისტრის მოვალეობის შემსრულებლის, აბას არაღჩის განცხადებით, ირანი აღარ განიხილავს IAEA-ს მოთხოვნებს ავტომატურად.
ამიერიდან, თითოეულ გადაწყვეტილებას მიიღებს ეროვნული უსაფრთხოების უმაღლესი საბჭო — ინდივიდუალურად და ირანის სტრატეგიული ინტერესების გათვალისწინებით.
„ამიერიდან ჩვენი თანამშრომლობა ატომური ენერგიის საერთაშორისო სააგენტოსთან განისაზღვრება ირანის უმაღლესი ეროვნული უშიშროების საბჭოს მეშვეობით. ატომური ენერგიის საერთაშორისო სააგენტოს მოთხოვნები ზედამხედველობის გაგრძელებასა და ირანთან თანამშრომლობაზე განიხილება უმაღლესი ეროვნული უშიშროების საბჭოს მიერ.
თითოეული საკითხი უნდა შეფასდეს ირანის უსაფრთხოების ინტერესების გათვალისწინებით. რადიოაქტიური მასალების გავრცელების რისკი მაღალია. ასევე სერიოზულია დარჩენილი საბრძოლო მასალის აფეთქების საშიშროება. ის, რომ სააგენტოს ინსპექტორებს შეუძლიათ, მიუახლოვდნენ ობიექტებს, ჩვენთვის უსაფრთხოების საკითხია და უნდა გადაიხედოს. ინსპექტორების უსაფრთხოებაც სერიოზულად განსახილველია.
ჩვენ ყოველთვის მზად ვიყავით მოლაპარაკებებისთვის ბირთვულ პროგრამაზე და მომავალშიც მზად ვიქნებით. თუმცა დარწმუნებული უნდა ვიყოთ, რომ განახლებული მოლაპარაკებები არ გადაიზრდება ომში აშშ-ისა თუ სხვა ქვეყნების მხრიდან“, – განაცხადა ირანის საგარეო საქმეთა მინისტრმა აბას არაღჩიმ.
