ესპანეთმა ჩრდილოატლანტიკურ ალიანსთან (NATO) მიაღწია შეთანხმებას, რომლის თანახმადაც, მას აღარ ექნება ვალდებულება, თავდაცვის ხარჯები მთლიანი შიდა პროდუქტის 5%-ამდე გაზარდოს.
ამის შესახებ ესპანეთის პრემიერ-მინისტრმა პედრო სანჩესმა კვირას სატელევიზიო მიმართვისას განაცხადა. ესპანეთის პრემიერის თქმით, ესპანეთი შეინარჩუნებს ვალდებულებებს 32-წევრიანი სამხედრო ალიანსის წინაშე, თუ თავდაცვაზე მშპ-ს 2.1%-ს გამოყოფს.
„ესპანეთის მთავრობამ NATO-სთან ახლახან მიაღწია შეთანხმებას, რომელსაც ჩვენ დადებითად ვაფასებთ. ის გვაძლევს საშუალებას, დავიცვათ ჩვენი ვალდებულებები ატლანტიკური ალიანსის მიმართ და შევინარჩუნოთ ერთიანობა ისე, რომ არ დაგვჭირდეს თავდაცვაზე მთლიანი შიდა პროდუქტის 5%-ის დახარჯვა. ჩვენ ვირჩევთ, რომ ჩვენი მშპ-ს 2% მივმართოთ ესპანეთის, ევროპისა და NATO-ს დაცვას, ხოლო დანარჩენი მოვახმაროთ სოციალურ პოლიტიკას, დიპლომატიას, განვითარებას, გლობალურ ვაჭრობასა და ჩვენს კეთილდღეობას“ – განაცხადა ისრაელის პრემიერმა პედრო სანჩესმა.
ნატოს ახალმა გენერალურმა მდივანმა მარკ რუტემ განაცხადა, რომ ცვლილება ეხება მხოლოდ ესპანეთს. მათ ტერმინი „ყველა მოკავშირე“ ამოიღეს დოკუმენტიდან.
სანჩესის თქმით, ესპანეთი ვერ აიღებს ვალდებულებას თავდაცვის 5%-იან დანახარჯზე. ნატოს შეფასებით, გასულ წელს ესპანეთმა თავდაცვაზე მშპ-ს მხოლოდ 1.28% დახარჯა, რაც ალიანსში ყველაზე დაბალი მაჩვენებელია. აპრილში სანჩესმა გამოაცხადა, რომ მიმდინარე წელს თავდაცვითი ხარჯები 2%-მდე გაიზრდებოდა, თუმცა ამ ნაბიჯს ქვეყანაში კრიტიკა და დაპირისპირება მოჰყვა, მათ შორის მისი პოლიტიკური მოკავშირეებისგანაც.
