შეერთებული შტატების პრეზიდენტმა დონალდ ტრამპმა აშშ-ში იმპორტირებულ საქონელზე 10-პროცენტიანი, ხოლო ათეულობით ქვეყნისთვის, რომლებსაც შეერთებულ შტატებთან სავაჭრო ურთიერთობა აქვთ, კიდევ უფრო მაღალი ტარიფები დააწესა, ევროკავშირიდან იმპორტირებულ საქონელზე კი 20-პროცენტიანი ტარიფი ამოქმედდა.
თეთრი სახლის მიერ გამოქვეყნებული სიის მიხედვით, დონალდ ტრამპმა 10%-იანი ტარიფი დაუწესა საქართველოსაც. თეთრი სახლი 2 აპრილის გადაწყვეტილებას უწოდებს „საპასუხო ტარიფებს“ და მიუთითებს, რომ 10% არის ტარიფი, რომელიც საქართველოს აქვს აშშ-ისთვის დაწესებული. რეგიონში 10%-იანი ტარიფი, საქართველოს გარდა, დაუწესდა თურქეთს, აზერბაიჯანს, სომხეთსა და უკრაინასაც.
აშშ-ის პრეზიდენტი დონალდ ტრამპი ამბობს, რომ ევროკავშირის ქვეყნები რთული და მკაცრი მოვაჭრეები არიან. მართალია, ევროკავშირის ქვეყნები მათი მეგობრები არიან, მაგრამ ისინი აშშ-ს აკოტრებენ. დონალდ ტრამპის თქმით, ეს ძალიან სამწუხარო ამბავია, რადგან 39%-ს იხდიან, საპასუხოდ კი 20-პროცენტიან ტარიფებს აწესებენ, ეს კი თითქმის ნახევარია.
MAKE AMERICA WEALTHY AGAIN! 💰
“This is one of the most important days… in American history; it’s our Declaration of Economic Independence. For years, hard-working American citizens were forced to sit on the sidelines… But now it’s our time to prosper.” – @POTUS 🇺🇸 pic.twitter.com/mKsAKIOtsp
— The White House (@WhiteHouse) April 2, 2025
ტრამპი ამერიკელებს დაჰპირდა, რომ წარმოებაც დაიწყება და სამუშაო ადგილებიც შეიქმნება შეერთებულ შტატებში, თუმცა მისი პოლიტიკა ეკონომიკური სტაგნაციის რისკს ქმნის, რადგან შესაძლოა მომხმარებლები და ბიზნესის წარმომადგენლები ფასების მკვეთრი მატების საფრთხის წინაშე აღმოჩნდნენ.
„ათწლეულების განმავლობაში ჩვენს ქვეყანას ძარცვავდნენ, შეურაცხყოფდნენ და სათავისოდ იყენებდნენ როგორც ახლო, ისე შორეული ერები, როგორც მეგობრები, ისე მტრები. ფოლადის ამერიკელი მწარმოებლები, ავტოინდუსტრიაში მომუშავე პირები, ფერმერები და გამოცდილი ხელოსნები დღეს აქ, ჩვენთან, არიან. ისინი რთულ მდგომარეობაში იყვნენ, ტანჯვით უყურებდნენ, როგორ ჰპარავდნენ მათ უცხოელი ლიდერები ჩვენს სამუშაო ადგილებს, უცხოელმა თაღლითებმა ააოხრეს ჩვენი ქარხნები და ე.წ. სვავებმა ნაწილებად აქციეს ეს ერთ დროს ლამაზი ამერიკული ოცნება“, – განაცხადა თეთრ სახლში სიტყვით გამოსვლისას დონალდ ტრამპმა.
ტრამპის განცხადება საფრთხეს უქმნის გლობალური ეკონომიკის არქიტექტურას და შესაძლოა უფრო ფართო სავაჭრო ომი გამოიწვიოს. ფოლადსა და ალუმინზე ტარიფების დაწესებას დიდი ხნის სავაჭრო პარტნიორების, მათ შორის ევროკავშირის მხრიდან უკვე მოჰყვა რეაგირება.
