უკრაინელი ოფიციალური პირები, სამხედროები და მოქალაქეები ბუჩაში შეიკრიბნენ, რათა აღენიშნათ რუსული ძალებისგან ქალაქის გათავისუფლების სამი წლისთავი.
რუსმა სამხედროებმა 2022 წლის თებერვალში, სრულმასშტაბიანი ინტერვენციის დაწყებიდან მალევე, დაიკავეს ბუჩა, რომელიც კიევიდან 35 კილომეტრში მდებარეობს.
ოკუპაცია თითქმის ერთი თვე გაგრძელდა, სანამ უკრაინულმა ძალებმა კონტრშეტევის ფარგლებში ოკუპანტები არ განდევნეს. ასობით სამხედრო და მოქალაქე დაიღუპა, თუმცა ამ გმირებს ხალხი არასდროს დაივიწყებს.
ბუჩის მერი ანატოლი ფიოდერუკი ამბობს, რომ ამ ბრძოლების დროს 306 დამცველმა ყველაზე ძვირფასი – სიცოცხლე გაწირა. მათი ხსოვნის პატივსაცემად ბუჩის მუნიციპალიტეტში მთელი დღის განმავლობაში გაიმართა ღონისძიებები.
უკრაინელ სამხედროებს ბუჩის გათავისუფლების შემდეგ საზარელი სურათი დახვდათ. ეს ადგილი ომის დანაშაულის ეპიცენტრი იყო. ქალაქში ასობით მშვიდობიანი მოქალაქის საერთო სამარხი აღმოაჩინეს, რუსეთის 33-დღიანი ოკუპაციის პერიოდში კი ათასობით სამხედრო დანაშაული გამოვლინდა.
ამ ბნელი დღეების გახსენება ახლაც უჭირთ ადგილობრივებს. ისინი ოფიციალური პირებისგან მოითხოვენ, ცეცხლის შეწყვეტის მიღწევის შეთანხმებისას არ წავიდნენ კომპრომისზე. ამ მიწის დაცვას უამრავი მეომარი შეეწირა, შესაბამისად, არავინ აპირებს მის დათმობას.
უკრაინის პრეზიდენტ ვოლოდიმირ ზელენსკის მიაჩნია, რომ რუსეთი შეგნებულად აფერხებს ცეცხლის შეწყვეტის შეთანხმებას. მიზანი კი უკრაინის უფრო მეტი ტერიტორიის მითვისებაა.
დაზვერვის ინფორმაციით, რუსეთი უახლოეს კვირებში ემზადება ახალი სამხედრო შეტევისთვის, რათა გააძლიეროს თავისი პოზიციები მოლაპარაკებების წინ.
