თეთრ სახლში აშშ-ისა და საფრანგეთის პრეზიდენტების შეხვედრა მიმდინარეობს. შეხვედრის პირველი ეტაპის შემდეგ ემანუელ მაკრონმა და დონალდ ტრამპმა ჟურნალისტების შეკითხვებს ოვალურ კაბინეტში უპასუხეს. ტრამპმა თქვა, რომ პუტინი დასთანხმდება ევროპელი სამშვიდობოების განლაგებას უკრაინაში და ომი შესაძლოა „კვირებში” დასრულდეს.
დონალდ ტრამპმა ასევე თქვა, რომ რუსეთის პრეზიდენტი ვლადიმერ პუტინი დაუშვებს ევროპელი სამშვიდობოების განლაგებას უკრაინაში, როგორც ომის დასრულების პოტენციური შეთანხმების ნაწილს.
საფრანგეთის პრეზიდენტმა ემანუელ მაკრონმა კი, ოვალურ კაბინეტში ჟურნალისტებთან საუბრისას განაცხადა, რომ ევროპა მზად არის, უზრუნველყოს უსაფრთხოების გარანტიები უკრაინისთვის, მათ შორის სამშვიდობო ძალები განალაგოს ცეცხლის შეწყვეტის შემთხვევაში.
For three years, Ukraine has been fighting with admirable courage against an aggressor—Russia.
For sovereignty and freedom.
Our support for Ukraine will remain unwavering. I am in Washington to reaffirm this and to move forward with President @realDonaldTrump and our allies. pic.twitter.com/ZUehOczJhM
— Emmanuel Macron (@EmmanuelMacron) February 24, 2025
როგორც ტრამპმა დასძინა, ვერ ხედავს პრობლემას ევროპული ჯარების უკრაინაში გაგზავნაში და ეს იდეა პუტინს უკვე გააცნო.
„დიახ, ის დასთანხმდება ამას”, – თქვა აშშ-ს პრეზიდენტმა.
აშშ-ის პრეზიდენტმა ასევე თქვა, რომ უკრაინის ომი შეიძლება დასრულდეს „კვირებში, თუ ჩვენ ჭკვიანები ვიქნებით. თუ ჩვენ არ ვიქნებით ჭკვიანები, ის გაგრძელდება… ჩვენ ეს არ გვინდა… ეს შეიძლება გადაიზარდოს მესამე მსოფლიო ომში, ჩვენ არც ეს გვინდა”.
ამასთან, დონალდ ტრამპმა ისაუბრა უკრაინასთან იშვიათი წიაღისეულის თაობაზე შეთანხმების შესახებ. მან თქვა, რომ უკრაინის პრეზიდენტი შტატებში შესაძლოა ჩავიდეს „ამ კვირაში, ან მომავალ კვირაში“.
„გამიხარდება მისი ნახვა“, – განაცხადა ტრამპმა და აღნიშნა, რომ შეთანხმების მიღწევა ძალიან ახლოსაა.
