უკრაინაში რუსეთის სრულმასშტაბიანი ომის მესამე წლისთავამდე ერთი დღით ადრე გერმანიაში ვადამდელი საპარლამენტო არჩევნები ჩატარდება.
მთელი წინასაარჩევნო კამპანიის განმავლობაში უკრაინის მხარდაჭერის საკითხი კანდიდატებისთვის და მათი პარტიებისთვის პრიორიტეტული არ ყოფილა.
უკრაინის საგარეო საქმეთა ყოფილმა მინისტრმა, დმიტრო კულებამ განმარტა, მისი აზრით, რატომ ითამაშა ასეთი მცირე როლი ომმა საარჩევნო კამპანიებში.
„არ გჯერა, რომ ეს შეიძლება შენც დაგემართოს. მიმოიხედეთ და ბერლინის ქუჩებში გაისეირნეთ. ყველაფერი ისეთი სასიამოვნოა. თქვენ გავიწყდებათ, რომ ეს ყველაფერი შეიძლება გაქრეს. არ გინდა ფიქრი, რომ ესაა ის, რაც შეიძლება შენს სახლშიც მოვიდეს. ისევე, როგორც ჩვენ ვერასდროს წარმოვიდგენდით, რომ მსგავსი რამ მოხდებოდა ჩვენს ქვეყანაში“, – ამბობს უკრაინის საგარეო საქმეთა ყოფილი მინისტრი, დმიტრო კულება.
კულებამ გააფრთხილა ევროპა რუსეთის პრეზიდენტის, პუტინის ამბიციებზე და დასვა კითხვა – ისწავლა თუ არა გერმანიამ და დასავლეთმა რაიმე ისტორიიდან.
„უკრაინის დაცემის შემთხვევაში პუტინი ნატოს გამოცდის. მე ამას არ ვამბობ, როგორც უკრაინელი, ვისზეც ხალხმა შეიძლება თქვას, რა თქმა უნდა, ის ცდილობს ჩვენს ომში ჩართვას, ჩვენს შეშინებას. თქვენ ვერ მოახერხეთ პუტინის მართვა 20 წლის განმავლობაში და მან ეს იცის. მისი ერთადერთი მიზანი იქნება უკრაინისა და დასავლეთის განადგურება, რადგან ესაა მისი ამბიცია. ასე სურს მას ისტორიაში ჩაწერა. არ გვიჯერებთ ზუსტად ისე, როგორც არ გვიჯერებდით 2022 წლამდე. აბა რა ვთქვა? ისტორია მეორდება და ევროპელი პოლიტიკოსები – რომლებიც ყოველწლიურად პირველი და მეორე მსოფლიო ომების წლისთავზე ამბობენ „აღარასდროს“ – იტყუებიან. ისტორია ისევ და ისევ მეორდება“, – ამბობს უკრაინის საგარეო საქმეთა ყოფილი მინისტრი, დმიტრო კულება.
გერმანიის მომავალი არჩევნები უმნიშვნელოვანესი იქნება არა მხოლოდ გერმანიისთვის, არამედ მთელი ევროპისთვის.
