რუსეთის ხელისუფლებამ ისტორიის მასწავლებელი, ამერიკელი მარკ ფოგელი თითქმის 4-წლიანი პატიმრობის შემდეგ გაათავისუფლა. თეთრმა სახლმა ეს ქმედება დიპლომატიური ურთიერთობის დათბობად შეაფასა. აშშ-ში ფიქრობენ, რომ ეს ნაბიჯი ხელს შეუწყობს მოლაპარაკებებს, რომლებიც უკრაინაში ომის დასასრულებლად უნდა გაიმართოს.
ფოგელი 2021 წლის აგვისტოში მოსკოვის აეროპორტში ნარკოტიკების გადატანის ბრალდებით დააკავეს. 61 წლის ფოგელი თითქმის ათი წლის განმავლობაში მუშაობდა ისტორიის მასწავლებლად მოსკოვის ერთ-ერთ სკოლაში, სადაც მის მოსწავლეებს შორის აშშ-ის დიპლომატების შვილებიც იყვნენ.
WELCOME HOME, MARC!🇺🇸 pic.twitter.com/0b2Igcqudp
— Donald J. Trump (@realDonaldTrump) February 12, 2025
თეთრი სახლის მრჩეველი ეროვნული უსაფრთხოების საკითხებში მაიკ უოლცი განმარტავს, რომ ეს ნაბიჯი რუსეთის მხრიდან კეთილი ნების გამოხატულებაა და ნიშანია იმის, რომ უკრაინაში სასტიკი და საშინელი ომის დასრულების მიმართულებით შეერთებული შტატები სწორ გზას ადგას და განაცხადა, რომ შეერთებულმა შტატებმა და რუსეთმა „გაცვლის შესახებ მოილაპარაკეს“ ფოგელის განთავისუფლების უზრუნველსაყოფად. მას არ უთქვამს, რას ითვალისწინებს გარიგება ამერიკის მხრიდან. გასულ თვეს ტრამპმა აღნიშნა, რომ მისი ადმინისტრაცია რუსეთთან სერიოზულ მოლაპარაკებას აწარმოებს ომთან დაკავშირებით, თუმცა კონკრეტულ საკითხებზე არ უსაუბრია.
რუსეთის ხელისუფლებას ჯერჯერობით მარკ ფოგელის გათავისუფლების შესახებ განცხადება არ გაუვრცელებია.
