ისრაელის პრემიერ-მინისტრი ბენიამინ ნეთანიაჰუ აცხადებს, რომ ცეცხლის შეწყვეტის შეთანხმებას გააუქმებს და ღაზაში ბრძოლას განაახლებს, თუ შაბათამდე „ჰამასი“ მძევლებს არ გაათავისუფლებს.
„ჰამასმა“ 21 ისრაელელი მძევალი ასობით პალესტინელი პატიმრის სანაცვლოდ გაათავისუფლა, თუმცა ორშაბათს, 10 თებერვალს, „ჰამასმა“ განაცხადა, რომ გადაავადებდა დამატებით სამი მძევლის გათავისუფლებას ისრაელის მიერ ცეცხლის შეწყვეტის შეთანხმების პირობების დარღვევის გამო.
მოვლენებს გამოეხმაურა აშშ-ის პრეზიდენტი დონალდ ტრამპიც და აღნიშნა, რომ ისრაელმა შეთანხმება უნდა გააუქმოს, თუ შაბათამდე „ჰამასი“ 70-მდე მძევალს არ გაათავისუფლებს.
„ჩვენმა კაბინეტმა ერთხმად მიიღო გადაწყვეტილება, რომ თუ „ჰამასი“ არ დააბრუნებს ჩვენს მძევლებს შაბათს შუადღემდე, ცეცხლის შეწყვეტის შეთანხმება დასრულდება და ისრაელის თავდაცვის ძალები კვლავ დაიწყებენ ინტენსიურ ბრძოლას იქამდე, სანამ „ჰამასი“ არ განადგურდება.
„ჰამასი“ არღვევს ცეცხლის შეწყვეტის შეთანხმებასა და არ ათავისუფლებს ჩვენს მძევლებს, ამიტომ გასულ ღამეს ისრაელის თავდაცვის ძალებს ვუბრძანე, დაეწყოთ ღაზის სექტორსა და მის გარშემო მობილიზაცია. ოპერაცია ახლაც მიმდინარეობს და ის უახლოეს მომავალში დასრულდება“, – ამბობს ბენიამინ ნეთანიაჰუ, ისრაელის პრემიერ-მინისტრი.
„ჰამასის“ წარმომადგენლები ამბობენ, რომ განაახლებენ მძევლების გაცვლის პროცესს მხოლოდ მაშინ, როცა ყველა მხარე დაიცავს შეთანხმების პირობებს.
