ღაზაში გატაცებული მძევლების ახლობლებმა და ოჯახის წევრებმა თელ–ავივში საპროტესტო აქცია გამართეს.
„ჰამასის“ განცხადებით, დროებით გადაიდო მძევლების გათავისუფლების პროცესი, რადგან ისრაელი მხარეებს შორის დადებულ ცეცხლის შეწყვეტის შეთანხმებას არღვევს.
პატიმრებისა და მძევლების გაცვლის მომდევნო ეტაპის ფარგლებში სამი ისრაელელი მძევლის სანაცვლოდ საპატიმროები ასობით პალესტინელს უნდა დაეტოვებინა. „ჰამასის“ სამხედრო ფრთის სპიკერი აბუ ობაიდას თქმით, ისრაელი გასული კვირების განმავლობაში სისტემატურად არღვევდა ცეცხლის შეწყვეტის შეთანხმებას.
საპასუხოდ ისრაელის თავდაცვის მინისტრმა ისრაელ კაცმა განაცხადა, რომ „ჰამასიც“ არ ითვალისწინებს შეთანხმების პირობებს, შესაბამისად, ისრაელის სამხედროები მუდმივ მზადყოფნაში არიან.
