შვედეთის პროკურატურამ შესაძლო დივერსიაზე მას შემდეგ დაიწყო გამოძიება, რაც კვირას, 26 იანვარს, ბალტიის ზღვაში კიდევ ერთი წყალქვეშა კაბელი დაზიანდა.
პროკურატურამ, აგრეთვე, გამოსცა ბრძანება, დააკავონ გემი, რომელიც ეჭვმიტანილია ლატვიისა და შვედეთის კუნძულ გოტლანდის დამაკავშირებელი ბოჭკოვანი კაბელის დაზიანებაში.
შვედეთის სანაპირო დაცვამ განაცხადა, რომ ისინი აკვირდებიან გემს, რომელიც, ადგილობრივი მედიის ინფორმაციით, მალტის დროშის ქვეშ დაცურავს.
სხვადასხვა წყაროს ინფორმაციით, გემმა რამდენიმე დღის წინ რუსეთის ერთ-ერთი პორტი დატოვა.
There is information suggesting that at least one data cable between Sweden and Latvia has been damaged in the Baltic Sea. The cable is owned by a Latvian entity. I have been in close contact with my Latvian counterpart, Prime Minister Evika Siliņa, during the day.
Sweden,…
— SwedishPM (@SwedishPM) January 26, 2025
ლატვიის სახელმწიფო რადიო და ტელევიზიის ცენტრმა განაცხადა, რომ მათ შეამჩნიეს ხარვეზები მონაცემთა გადაცემისას და დაასკვნეს, რომ კაბელი დაზიანებული იყო.
„ჩვენ დავადგინეთ, რომ კაბელი გარე ზემოქმედების შედეგად დაზიანდა. ვფიქრობთ, რომ დაზიანება სერიოზულია, რადგან პროცესში საზღვაო ძალებიც ჩაერთნენ. ექსპერტები მუშაობენ და ვარაუდობენ, რომ ასეთი დაზიანება გარე ზემოქმედების შედეგია“, – ამბობს ევიკა სილინა, ლატვიის პრემიერ-მინისტრი.
კაბელის დაზიანების შემთხვევა 18 ნოემბერსაც იყო. მაშინ ეჭვმიტანილი ჩინეთის დროშის ქვეშ მცურავი გემი იყო.
იანვრის დასაწყისში ნატომ დაიწყო მისია, რომელიც ბალტიის ზღვის გაძლიერებულ მეთვალყურეობას ითვალისწინებს. განვითარებულმა მოვლენებმა რუსული დივერსიისა და ჯაშუშობის მიმართ შიში გააძლიერა.
