ამერიკის შეერთებული შტატების კონგრესმა 2024 წლის საპრეზიდენტო არჩევნებში დონალდ ტრამპის გამარჯვება ოფიციალურად დაამტკიცა.
აშშ-ის წარმომადგენელთა პალატისა და სენატის წევრებმა საარჩევნო კოლეგიის ხმები ერთობლივ სხდომაზე დაითვალეს. სხდომას აშშ-ის ვიცე-პრეზიდენტი კამალა ჰარისი გაუძღვა.
აშშ-ის ვიცე-პრეზიდენტმა დონალდ ტრამპს გამარჯვება კიდევ ერთხელ მიულოცა და ამ დღეს მნიშვნელოვანი უწოდა.
„აშშ-სთვის დღეს ძალიან მნიშვნელოვანი დღე იყო, ვგულისხმობ იმას, თუ რა უნდა იყოს ნორმა, ჩვენი დემოკრატიის ერთ-ერთი ყველაზე მნიშვნელოვანი საყრდენი. ეს არის ძალაუფლების მშვიდობიანი გადაცემა. დღეს მე გავაკეთე ის, რასაც მთელი ჩემი კარიერა მივუძღვენი – მხარი დავუჭირე და დავიცავი შეერთებული შტატების კონსტიტუცია, შევასრულე ჩემი კონსტიტუციური მოვალეობა და დავიცავი დადებული ფიცი“, – განაცხადა აშშ-ის ვიცე-პრეზიდენტმა კამალა ჰარისმა.
5 ნოემბერს გამართულ აშშ-ის საპრეზიდენტო არჩევნებში „რესპუბლიკური პარტიის“ კანდიდატმა დონალდ ტრამპმა საარჩევნო კოლეგიის 312 ხმა მიიღო, ხოლო „დემოკრატიული პარტიის“ კანდიდატმა კამალა ჰარისმა 226 ხმა.
აშშ-ის არჩეული პრეზიდენტის, დონალდ ტრამპის, ინაუგურაცია 20 იანვარს გაიმართება.
