13 ნოემბერს, ღამით, საფრანგეთის დედაქალაქში პალესტინის მხარდამჭერი ჯგუფებისა და ულტრამემარცხენეების ორგანიზებით, საპროტესტო აქცია გაიმართა. დემონსტრანტებმა გააპროტესტეს ისრაელის ულტრამემარჯვენეების მიერ გასაიდუმლოებულ ადგილზე ჩატარებული ღონისძიება, რომელიც ისრაელის არმიისთვის თანხის შეგროვებას ისახავდა მიზნად. მიუხედავად იმისა, რომ პროტესტი მეტწილად მშვიდობიანი იყო, დემონსტრანტებმა რამდენიმე ობიექტი – მაგალითად, „მაკდონალდსი” და „კარფური”, მაინც დაარბიეს.
პარიზში ისრაელელმა ულტრამემარჯვენეებმა ისრაელისთვის თანხის შესაგროვებლად გასაიდუმლოებულ ადგილას გამართეს ღონისძიება. ამ ღონისძიებას უნდა დასწრებოდა ისრაელის ფინანსთა მინისტრი ბეცალელ სმოტრიჩიც, თუმცა მან ეს ვიზიტი გააუქმა. დემონსტრაცია პალესტინის მხარდამჭერი ჯგუფებისა და საფრანგეთის ულტრამემარცხენეების მიერ იყო ორგანიზებული.
აქციის ერთ-ერთი მონაწილე ამბობს, რომ ეს მორიგი ღონისძიებაა, რომელსაც თავად „საშინელ ისრაელს“ უწოდებს. ისინი ეპატიჟებიან ისეთ ადამიანებს, რომლებიც ახალისებენ და თესავენ სიძულვილსა და რასიზმს. მისი შეფასებით, ეს დეჰუმანიზაციაა.
საფრანგეთის ხელისუფლებამ არ გააუქმა ღონისძიება და განმარტა, რომ ის არავის უქმნის საფრთხეს და არ არღვევს საზოგადოებრივ წესრიგს. ამ განცხადებამ კიდევ უფრო მეტად განარისხა მომიტინგეები და ზოგიერთი მემარცხენე პოლიტიკოსი.
საფრანგეთის პარლამენტის წევრი თომას პორტესი შეშფოთებას არ მალავს და ამბობს, რომ ისინი მდიდრულ დარბაზში იმისთვის შეიკრიბნენ, რომ შეაგროვონ ფული ისრაელის იმ არმიის დასაფინანსებლად, რომელიც შემდეგ ბავშვებს დახოცავს პალესტინაში.
