კვირას ისრაელის პრემიერ-მინისტრმა ბენიამინ ნეთანიაჰუმ განაცხადა, რომ უკვე სამჯერ ესაუბრა აშშ-ის ახლად არჩეულ პრეზიდენტ დონალდ ტრამპს.
ბოლო რამდენიმე დღის განმავლობაში ისრაელის პრემიერ-მინისტრი ბენიამინ ნეთანიაჰუ სამჯერ ესაუბრა დონალდ ტრამპს. ნეთანიაჰუს შეფასებით, მათი დისკუსიები წარმატებული და მნიშვნელოვანი იყო. მათ საერთო პოზიცია აქვთ ირანიდან მომდინარე სხვადასხვა საფრთხეზე.
სანამ ტრამპი თანამდებობის ოფიციალურად დასაკავებლად ემზადება, ისრაელს კვლავ მიაქვს იერიში ღაზის სექტორზე. ის ასევე აძლიერებს სამხედრო კამპანიას „ჰეზბოლას“ წინააღმდეგ ლიბანში.
ისრაელსა და ირანს შორის დაძაბულობა სულ უფრო მეტად მწვავდება. დეესკალაციის ნიშნები კი ჯერ არ ჩანს. ისრაელი ასევე ჩართულია მუდმივ კონფლიქტებში ირანის მიერ მხარდაჭერილ მარიონეტებთან ერაყსა და იემენში. ისრაელისთვის ირანის ბირთვული პროგრამა დიდ საფრთხეს წარმოადგენს.
ნეთანიაჰუ ამსტერდამში თელ–ავივის „მაკაბის“ საფეხბურთო გუნდის გულშემატკივრებზე ანტისემიტურ თავდასხმას გამოეხმაურა. ჰოლანდიის პრემიერ-მინისტრმა დიკ სხოფმა განაცხადა, რომ ეს მისი და ჰოლანდიის სირცხვილია. ნეთანიაჰუმ სხოფს თავდამსხმელების მკაცრი დასჯისკენ მოუწოდა.
ინციდენტის შემდეგ ამსტერდამის პოლიციამ ფართომასშტაბიანი გამოძიება დაიწყო ახალგაზრდული დაჯგუფებების მიერ განხორციელებულ ძალადობრივ თავდასხმებზე, რომლებიც, სავარაუდოდ, წახალისებული იყო სოციალურ მედიაში გავრცელებული მოწოდებებით ებრაელების წინააღმდეგ.
ევროპის ლიგის მატჩის შემდეგ, ამსტერდამი უსაფრთხოების ზომებს აძლიერებს
მიყენებული დაზიანებების გამო ხუთი ადამიანი ადგილობრივ საავადმყოფოებში გადაიყვანეს, 60-ზე მეტი ეჭვმიტანილი კი დააკავეს.
ამსტერდამის პროკურორებმა დაადასტურეს, რომ ოთხი ეჭვმიტანილი, მათ შორის ორი არასრულწლოვანი, კვლავ დაპატიმრებულია. შემდეგი სასამართლო პროცესი მომდევნო კვირაშია დანიშნული. მათი თქმით, ეჭვმიტანილთა და დაკავებულთა წრე შესაძლოა გაფართოვდეს, რადგან გამომძიებლები ჯერ კიდევ თავდასხმების ამსახველი ვიდეოკადრების შესწავლის პროცესში არიან.
ბოლო ინფორმაციით, მატჩის დაწყებამდე ისრაელის ფეხბურთის გულშემატკივრებმა ქალაქში რამდენიმე ადგილას ჩამოხიეს პალესტინის დროშა, ისინი ასევე ანტიარაბულ ლოზუნგებს ავრცელებდნენ. იყო დაპირისპირების შემთხვევებიც.
